Koordenadór KDL, Cipriano das Neves. Imajen/Nelson de Sousa

DILI, 26 jullu 2019 (TATOLI)-Komisaun Diretu Labarik (KDL)  ho nia parseiru sira prontu  atu fó asisténsia ba labarik sira ne’ebé inan laiha kbiit atu kuidadu.

“Ita halo kooperasaun ho parseiru sira ba servisu protesaun sosiál, hanesan uma mahon ba labarik orfanatu no seluk tan prontu tau matan,”  hateten, Koordenadór KDL, Cipriano das Neves, ba Ajénsia TATOLI, ohin, iha edifísiu Ministériu Solidariedade Sosiál no Inkluzaun (MSSI), Caicoli, Dili.

Komisaun ne’e iha ninia papél importante hodi promove no proteje diretu labarik sira hahú hosi tinan 0-17 tanba ne’e bainhira inan feton sira enfrenta situasaun ne’e tenke iha responsabilidade no brani atu informa no koordena ho komisaun hodi fó asisténsia.

“Dezafiu ida mak ne’e to’o ohin loron KDL la-simu informasaun mai  direta dehan atu partu laiha kondisaun no kbiit atu hakiak, maibé  la presiza soe bebé,” hateten Cipriano das Neves.

Bazeia ba nia observasaun  pesoál nota, kazu ne’e akontese tanba fatór morál familia menus, fatór ekonomia no ransu livre. Tanba ne’e,  sensibilizasaun no edukasaun sívika importante ba foin-sa’e atu iha responsabilidade ba ida-idak nian aan hodi prevene hosi kazu abortu no soe bebé.

Nia informa, durante ne’e KDL hala’o ona sensibilizasaun  no edukasaun sívika iha Postu Administrativu no Munisípiu  iha Dili no munisípiu sira seluk tan.

 Jornalista      : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here