DILI, 26 jullu 2019 (TATOLI)—Governu liuhusi Ministériu Saúde, ohin, halo lansamentu ba eventu Car Free Day ka Loron Livre Kareta (CFD, sigla Inglés) ho atividade fízika halo jinástika  nu’udar ezersísiu saudável hodi redus moras.

“Ministériu Saúde ohin lansa eventu Car Free Day hodi halo amizade instituisaun relevantes sira,  oinsá atu hadi´a no eleva no atividade fízika ida hodi redus moras sira ne’ebé mak durante iha globál no kresimentu ba iha moras la hada´et nian,” dehan Vise Ministra Kuidadu Saúde Primaria, Elia dos Reis, ba Ajénsia TATOLI liuhusi entrevista hafoin halo lansamentu no ramata hala’o atividade físiku iha Resintu Palasiu das Cinzas, Kaikoli, Dili, sesta (26/07/2019).

Nia informa, moras sira ne’ebé la hadaet mak hipertensaun, kardiolojia, diabetes melitus ba iha rins krónika. Tanba ne’e, nia dehan, sidadaun ida-idak tenke halo atividade fízika sai hanesan “estilo de vida” ida.

“Durante ne’e, ita iha ‘estilo de vida’ mak iha hanesan han naan-bokur, han mina maibé ita la halo atividade fízika entaun impaktu mós ba saúde ne’ebé mak afeta tebes ba iha populasaun sira-nia moris liliu saúde,” nia akresenta.

Tanba ne’e nia hatutan, Ministériu Saúde hala’o atividade fízika iha Sentrál Dili, iha kada sesta feira kada semana, mak hanesan jinástika, poco-poco ho zumba. Alende ne’e, iha mós atividade  tetu todan, sukat altura ho saúde ambientál, konsulta jerál mak hanesan koko tensaun ho raan-mudar.

Atividade hirak ne’e, nia esplika, sei implemanta mós iha munsípiu sira seluk. Intensaun prinsipál mak atu fanu populasaun sira book án mínimu minutu 30 loron ida, bele redus moras sira no hahan sira ne’ebe mak ita lakohi atu dupla iha ita-nia isin-lolon.

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here