Espesialista sira husi WARTSILA aprezenta estudu pre-viabilidade kona-ba konversaun ba sistema kombustivel, liuliu fornesimentu LNG (Liquefied Natural Gas) ba sentrál eletrisidade Hera ba Ministru Obra Públika (MOP), Salvador Eugénio Soares dos Reis Pires. Foto/MOP.

DILI, 26 jullu 2018 (TATOLI)-Kompañia Wartsila aprezenta estudu pre-viabilidade ba Ministériu Obra Públika (MOP) kona-ba sistema kombustivel iha sentrál elétrika Hera, atu la’ós uza de’it gazoél, maibé uza mós gás hodi prodús enerjia.

“Aprezenta estudu ba konversaun sistema kombustivel iha sentrál elétrika Hera ba gás ho sistema Liquefied Natural Gas (LNG) ba komponente hanesan tau iha terminál, lori mai iha armazein pois modifikasaun ba mákina atu la’ós de’it uza kombustivel digicel ka solar, maibé uza mós gás atu prodús enerjia ho kustu baratu liu”, Ministru Obra Públika, Salvadór Eugénio Soares dos Reis Pires, afirma ba ajénsia Tatoli iha Kaikoli, ohin.

Tanba ne’e, Ministru MOP, salienta prepara hela dokumentu atu halo konkursu públiku hodi hala’o estudu viabilidade, tanba ne’e Governu daualuk hakarak avansa ho projetu ne’e, atu orsamentu ba akizisaun mina hodi prodús enerjia bele redús.

Ministru MOP, dehan akizisaun kombustivel iha kada tinan Governu prevee Orsamentu Jerál Estadu (OJE) millaun $102 ho millaun 150 litru, ne’ebé karun tebes tanba presu gazoél depende merkadu mundiál.

Ministru MOP haktuir “Ita sei halo poupansa ba kustu orsamentu ho porsentu 40 to’o 50 husi orsamentu kombustivel ne’ebé ita uza ba akizisaun kombustivel iha orsamentu jerál kada tinan”.

Nune’e, ho mudansa ne’e, sei redús kustu hodi mellora no moderniza sistema subvensaun Dili laran atu hasa’e reseita no investe iha infraestrutura no dezenvolvimentu institusionál hodi transforma Eletrisidade Timor-Leste (EDTL) ba empreza públika, atu la presiza subsidia osan barak ba operasaun.

Governante ne’e adianta, Governu hanoin ona atu mellora tan sistema kustu ba enerjia elétrika hodi halo poupansa atu uza osan ba setór seluk hanesan edukasaun, saúde no agrikultura.

“Ita agradese Governu tuan investe ona iha sentrál elétrika Hera no Betanu ne’ebé mak Governu agora buka atu mellora tan dezenvolvimentu ne’ebé Governu anteriór halo”, MOP garante.

Jornalista: Florêncio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here