Foto espesiál

DILI, 25 jullu 2019 (TATOLI)—Sekretáriu Estadu Juventude no Desportu (SEJD), Nélio Isaac Sarmento informa katak, tinan ida ne’e (2019), Governu la tau orsamentu ba eventu Tour de Timor tanba eventu ne’e la’ós Governu nian.

“Tinan ida ne’e, ita la tau osan ba Tour de Timor tanba eventu ida ne’e la’ós Governu nian. Eventu ida ne’e kompañia ida nian. Kompañia ne’e mak Novel Lda.  Kompañia ne’e organiza eventu refere iha tinan-tinan liuhusi kooperasaun ho Governu maibé Governu fó apoiu morál de’it,” tenik Nélio ba Agência Tatoli iha salaun Xanana Sport Center, Bairro Formosa, Dili, ohin.

Nia hatutan, tinan oin, Governu iha ona hanoin atu kria kompetisaun Bisikleta bele hala’o ho maneira hanesan Tour de Timor ka oin seluk tanba foin iha planu nia laran.

Gevernante ne’e afirma, hala’o eventu Bisikleta modelu Tour de Timor di’ak tanba bele dada Turista sira hosi estranjeiru hatama reseita ba estadu.

“Ita hanoin ona katak tinan oin ita atu halo modelu nusa—bolu Tour Illa de Timor. Governu sei tetu katak ida ne’e Kúpaun ho Timor tama hotu ka, Timor mesak de’it mak tama. Se eventu ne’e la’o, foin ida ne’e eventu Governu nian,” Nélio esklarese.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here