Reprezentante UNICEF TL, Valerie Taton

DILI 25 jullu 2019(TATOLI)-Fundu Nasaun Unida Ba Labarik Sira (UNICEF-sigla inglés) realiza workshop loron ida ho tema “Se mak te´in iha uma?” durante loron ida, iha Timor Plaza, Suai Room, pizu 4, iha kinta (25/07/2019).

“UNICEF Kria workshop ida ho tema se mak te´in iha uma  liga liubá má nutrisaun ho nia papel oinsa ema sira ne’ebé te´in iha uma ka koziñeira iha uma no  te´in la´ós ba hahan de´it maibé oinsa atu koneksaun ho oan sira para  diverte mós sira no kria domin iha uma laran,” hateten reprezentante UNICEF, Valerie Tanton liuhusi entrevista hafoin workshop ne´e.

“Tanba ita haree katak UNICEF hala´o atividade barak ona iha Timór no agora ninia kontinuasaun ba oin oinsa mak ita halo nafatin atividade sira tanba ho tópiku espesialidade ne´ebé mak sei determina iha tempu oin mai no mós ita hare katak papel inan no aman iha uma laran ne´e oinsa atu te´in ba oan sira ne´e hanesan matéria importante tebes ba ita inan-aman sira,” hateten tan reprezentante ne´e.

Nia konsidera, problema má nutrisaun iha Timor-Leste boot no nia efeitu la´ós ba labarik sira-nia fíziku maibé ba moos sira-nia dezenvolvimentu kakutak. Tanba ne´e, faktór ne´ebé fó impaktu ba má nutrisaun la´ós husi hahan de´it maibé mós husi saneamentu.

“Agora daudaun ne’e interasaun labarik inan-aman sira nian, kuidadu ba oan sira, ida ne’e mós importante ba labarik sira nia moris,” tenik Valérie Taton.

Iha biban hanesan, reprezentane UNICEF ne’e hato’o mensajen ba inan-aman sira hotu katak bainhira prepara hahan ba labarik sira, hahan ne’ebé mak iha nutrisaun no hahan ne’ebé mak di´ak no prepara mós inan-aman nia  domin ba labarik sira.

Jornalista: Felicidade Ximenes

Editór     : Rafy Belo

HAKEREK NO HATÁN

Please enter your comment!
Please enter your name here