Ró Haksolok. Imajen dok. ZEESM

OÉ-CUSSE, 25 jullu 2019 (TATOLI)—Prezidente Autoridade Rejiaun Administrativa Espesiál Oé-Cuse Ambeno (RAEOA), Marí Bim Amude Alkatiri hateten problema Ró Haksolok ne’e kestaun jurídiku, tan ne’e nia nomea ona advogadu atu akompaña no garante katak sei rezolve hodi lori ró ne’e mai Timor.

‘‘Ha’u nomea ona advogadu atu haree kestaun ne’e,” nia dehan ba Tatoli iha RAEOA, kinta (25/7).

Alkatiri hatutan katak nia sei la ba vizita Ró Haksolok tanba laiha nesesidade no la’ós problema Timor nian tanba problema ne’e empreza nian.

Tuir nia katak problema Ró Haksolok la’ós problema ne’ebé úniku iha Timor maibé sei iha problema barak liu ne’ebé presiza atu rezolve.

“Agora atu besik ona rezolve problema jurídiku no Ró Haksolok ne’e diferente ho asuntu barak iha rai laran ne’ebé mak presiza rezolve,” nia informa.

Nia fó ezemplu katak Portu Naval Hera ne’ebé to’o oras ne’e luku tiha ba tasi laran maibé ema hotu nonók lakon.

Kona-ba osan adiosionál ne’ebé ema barak kestiona ba Ró Haksolok, Alkatiri hatán, projetu bar-barak iha rai Timor ne’e, laiha ida mak laiha adisionál, balun osan adisionál pursentu 100 tan maibé hotu-hotu nonók.

Nia mós kestiona katak tanbasá mak Ró Haksolok de’it mak labele iha osan adisionál no konsidera katak hahú primeiru kedas sala tiha ona, tanba negosiasaun uluk ne’ebé Governu Sentrál halo ne’e mak sala tiha ona.

“Primeiru, hili empreza ida ne’ebé laiha kapasidada atu lori serbisu ne’e ba to’o rohan. Segundu maka ró nia folin ne’ebé sira avansa ne’e, halo tiha auditória independente dala rua ona, katak ho folin hanesan ne’e, maibé nunka bele halo Ró Haksolok,” eis Primeiru-Ministru ne’e tenik.

Nia fó ezemplu katak, Ró Nakroma II ne’ebé ho folin euru millaun 18.5, ne’ebé kompara ho Ró Haksolok,hanesan kora-kora ho ró boot ida.

Jornalista: Cipriano Colo

Editór: Xisto Freitas

Notísia relevante sira:

Prezidente RAEOA Konsidera Seidauk Iha Kontratu Adisionál Millaun $14 Ba Ró Haksolok

Kazu Ró Haksolok, Semana Ne’e Tribunál Deside Kapasidade Finanseiru Kompañia

Polémika Ró Haksolok, KHUNTO Ezije Prezensa Alkatiri ho José Agustinho iha PN

 

2 KOMENTÁRIU

HAKEREK NO HATÁN

Please enter your comment!
Please enter your name here