Prezidente Federasaun Futeból Timor -Leste (FFTL), Francisco Gerónimo

DILI, 25 Jullu 2019 (TATOLI)—Federasaun Futeból Timor-Leste (FFTL) hanesan organizasaun ida ne’ebé fó mahon ba Assosiasaun Futeból hotu iha munisípiu. Tanba ne’e, programa prinsipál FFTL 2019 sei realiza eventu nasionál iha munisípiu sanulu resin tolu (13) ho tema “lori bola ba munisípiu” nune’e bele hamoris no hadi’a foinsa’e sira-nia talentu iha mundu futeból.

Prezidente FFTL, Francisco Gerónimo hateten planu ne’ebé iha fiksu ona sei realiza tinan ida ne’e. “Ami agora hahú uluk ho programa lori bola ba assosiasaun sira iha munisípiu. Iha 28 jullu, munisípiu hotu sei hala’o hotu jogu iha nível sekundáriu,” dehan Francisco ba Agência Tatoli iha edifísiu FFTL, Bairru Formosa, Dili, ohin.

Orsamentu ne’ebé apoiu jogu refere FFTL mai hosi kooperasaun ho kompañia Telecomcel hamutuk rihun tolunulu resin.

Nia dehan, kampu hodi realiza jogu dadaun ne’e prontu ona iha munisípiu ida-idak. “Kampu jogu iha ona. Kona-ba atu hadi’a di’ak liu-tan, ami husu ba Governu atu entrega mai ami hadi’a. Ami prontu hadi’a di’ak liu,” tenik ema númeru ida iha FFTL ne’e.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here