OÉ-CUSSE, 25 jullu 2019 (TATOLI)—Dezde tinan 2015 hala’o kna’ar, Autoridade Rejiaun Administrativa Espesiál Oé-Cuse Ambeno (RAEOA), iha viatura 417.
Dadus hirak ne’e, relata hosi Diretór Rejionál Patrimóniu Estadu, Dionísio Maniquin, iha nia sebisu fatin, Aldeia Sanane, Suku Kosta, Sub Rejiaun Pante Makassar, RAEOA.
Nia esplika, viatura hirak ne’e kompostu hosi karreta 104 ne’ebé oras ne’e 79 sei di’ak no 25 aat.
Alende ne’e, motorizada hamutuk 313 ne’ebé oras ne’e iha 282 mak sei di’ak no 31 mak aat.
Kona-ba tipu kareta, diretór ne’e temi detalla katak, iha tipu Mitsubishi, Hilux no seluk tan, inklui motorizada ho tipu Mega Pro, Supra no KLX.
Iha fatin seluk, Sekretária Rejionál Finansa RAEOA, Leonia Monteiro, hateten hosi viatura hirak ne’e oras ne’e balun sei di’ak no balun iha hela manutensaun.
Kona-ba kontrolu, Leonia esplika, bainhira empreza ne’ebé manán, Autoridade aprezenta levantamentu ba sira, atu halo fali verifikasaun ba viatura ne’ebé di’ak no aat atu bele tama iha manutensaun.
Periudu manutesaun iha kategoria A, B no C ne’ebé hala’o mensálmente, dalaruma mós bele to’o fulan tolu, depende ninia kilometrajen.
Nia hatutan, dezde Autoridade simu viatura hosi nasionál iha tinan 2015, autoridade fó sai kedas sirkulár ba funsionáriu ne’ebé sai responsável ba viatura hirak ne’e, atu nune’e bele uza ho kuidadu.
Ho sirkulár ne’e mak regula funsionáriu ka utilizadór sira bele la’o ho di’ak to’o ohin loron, tanba sira sempre kumpri, liliu bainhira enxe kombustível, sira sempre uza formatu ida (trip tiket), iha ne’ebé semana ida viatura ida sira uza litru 40.
‘‘Haree ba Oé-Cusse ne’ebé kloot, entaun ami fó de’it litru 40 ba movimentu,’’ Leonia hateten ba Tatoli iha Palaban, Oé-Cusse, kinta (25/5).
Kona-ba motór ne’ebé profisionál sira uza, Autoridade fó litru 4 kada semana, no bainhira funsionáriu sira la aprezenta trip tiket maka sei la bele enxe, no tenke enxe uza osan rasik.
Autoridade mós iha regra espesiál ida katak, iha sábadu no domingu funsionáriu sira labele utiliza viatura estadu, eseptu bainhira nesesidade duni atu halo serbisu iha loron feriadu, sempre iha karta autorizasaun.
Iha fatin hanesan, Diretór Jerál Finansa Estadu, Januario da Gama, hateten Ministériu Finansa antes ne’e halo ona levantamentu ba utilizasaun patrimóniu estadu iha RAEOA no aprezenta ona durante treinamentu ba funsionáriu kona-ba Jestaun Patrimóniu Móveis Estadu.
Iha aprezentasaun rezultadu hatudu katak, baze dadus viatura ne’ebé iha, kompriensivu ona, maibe presiza halo ajustamentu balun hodi bele kompleta liu-tan nia deskrisaun hirak ne’ebé seidauk kompletu.
Nia hateten, rezultadu ne’e la’ós atu halo julgamentu, maibé aprezenta oinsá deskobre liu-tan failansu ne’ebé iha nune’e Ministériu Finansa halo rekomendasaun hodi bele hadi’a.
Jornalista: Cipriano Colo
Editór: Xisto Freitas
