Social Cultural Adviser for Legislative and Judicial Reform, Josh Trindade. Imajen/Domingo Piedade Freitas

ERMERA, 25 jullu 2019 (TATOLI) – Governu liuhosi Ministru Reforma Lejizlativa no asuntu Parlamenteres (MRLAP), agradese lian na’in no liurai sira ne’ebé mak kolaborativu tebes iha atividade konsultasaun públiku Lei kostumeiru no justisa tradisionál, ohin,  iha Munisípiu Ermera.

Social Cultural Adviser for Legislative and Judicial Reform, Josh Trindade, lori MRLAP nia naran  hato’o agradese boot ba lia na’in no liurai sira ne’ebé, bele mai partisipa iha eventu ida nee, agradese mós ba Ministériu Estatál no estrutura Munisípiu ne’ebé fo apoiu di’ak tebes hodi organiza konsultasaun públiku ne’e.

“Ha’u hanoin objetivu husi konsulta públiku ida nee maka, atu rekolla informasaun tékniku sira hosi lia na’in sira kona-ba oinsá sira nia mekanizmu no prosesu tesi lia, hodi  rezolve kazu, disputa, no konflitu iha sira nia fatin ou suku ida idak, no informasaun sira nee sei uza hodi estabelese enkuadramentu legal ida, oinsá halo ligasaun entre lei formal, no lei tradisionál tanba sistema lei rua nee agora daudaun komunidade sira uza hela maibé laiha ligasaun ba malu,” hateten Josh Trindade.

Josh esplika,  lei kostumeiru no justisa tradisionál antes nee halo barak ona, balun governu maka halo, no balun NGO sira maka halo, balun fali hosi akadémiku sira ka doadór sira.

“Peskiza sira nee MRLAP uza ona nudár referénsia  no MRLAP mós  identifika lakunas sira hosi estudu lubuk ne’ebé halo ona,” nia tenik.

Konsulta públiku ida nee sei hala’o iha territóriu tomak, tuir lian ida-idak nian, mak MRLAP identifika iha lian 18 no total konsulta públiku ne’ebé MRLAP sei halo hamutuk 25.

MRLAP haree katak hosi estudu hotu ne’ebé iha ona, seidauk iha estudu kompriensivu ida ne’ebé kobre lian ka dalen sira iha Timor laran tomak. Ho konsulta publika ida nee, sei hatene loloos kona ba saida maka diferente ka hanesan kona ba prosesu tesi lia no justisa tuir dalen ida-idak.

Josh Trindade mós afirma liu tan katak rezultadu hosi konsulta ida nee sei uza hodi hakerek dokumentu polítika ida hodi sai hanesan baze ba dezenvolve enkuadramentu legal ida,  ba ligasaun entre  lei formal no lei tradisionál.

Jornalista          : Domingos Piedade Freitas

Editór                 : Francisco Simões

HAKEREK NO HATÁN

Please enter your comment!
Please enter your name here