Diretór Jerál Asuntu Konsulár Protokolár, Serimoniál no Mídia, hanesan mós Vise Koordenadór Jerál Protokolu, Juvêncio de Jesus Martins

DILI, 25 jullu 2019 (TATOLI)-Komisaun Organizadora ne ebé kompostu husi liña ministeriál sira kontinua halo enkontru preparativu ba komemorasaun loron Konsulta Populár, 30 Agostu.

“Objetivu enkontru ne’e hanesan koordenasaun tanba husi prezidente komisaun fó orden para semana-semana organiz traballu ba preparativu”, hateten Diretór Jerál Asuntu Konsulár Protokolár, Serimoniál no Mídia, hanesan mós Vise Koordenadór Jerál Protokolu, Juvêncio de Jesus Martins, depois ramata enkontru iha Ministériu Finansa Aitarak laran, ohin.

Vise Koordenadór Jerál Protokolu ne’e haktuir enkontru ne’e diskute kona-ba protokolu, seguransa sívil ba munisípiu sira hanesan Lospalos, Vikeke, Manatutu, Dili no haree ba sira-nia programa.

“Parte protokolu nian, haree ami-nia konfirmasaun hira ona, fó ba hothotu rona, hola desizaun atu fó tan prazu ba ita-nia bainaka sira to’o dia 31, hanesan prazu finál, dia 1 sei enkontru fali hodi fó hatene sé mak mai no sé mak la mai”.

Nia hatutan tan : “Figura boot ita konvida barak maibé konfirma ne’e, Prezidente Asembleia Portugal nian, Prezidente Indonézia Jokowi ko’alia maibé seidauk fiksu, Primeiru-ministru Austrália, Prezidente Sahara Osidentál, Primeiru-ministru Cabo Verde mós atu mai, Enviadu Espesiál Sekretáriu ONU, nia halo video ida mai (loke) iha ne’e”.

Juvêncio de Jesus Martins relembra Prezidente Komisaun Organizadora, Kay Rala Xanana Gusmão dehan lembra de’it ba munisípiu tolu hanesan Lautein, Baukau, Vikeke.

“Atu lembra de’it ba munisípiu tolu; Lautein, Baukau, Vikeke, kuandu imi halo reflesaun, labele haluha matebian, sira matebian importante tebtebes”,nia fó hanoin.

“Enkontru ne’e, la’ós enkontru ba ikus nian maibé semana oin haree fali iha setór balun ne’ebé  seidauk diskute, semana oin foin hatene enkontru ikus bainhira”, informa diretór jerál hanesan mós vise koordenadór jerál ba protokolu ne’e.

Jornalista: Nelia Fernandes

Editór: Rafi Belo

HAKEREK NO HATÁN

Please enter your comment!
Please enter your name here