Vendedór ai-fuan fresku iha merkadu Lecidere. Imajen António Goncalves

DILI, 24 jullu 2019 (TATOLI)—Tuir Observsaun Komisaun Justisa no Pás Dioseze Dili katak durante ne’e problema kona-ba sidadaun ne’ebé fa’an iha dalan ibun, la rezolvidu tanba merkadu iha Dili rua de’it, hanesan Taibessi no Manleuana.

Tanba ne’e, husu ba governu liuhusi Ministériu Administrasaun Estatal no Autoridade Munisipál Dili atu loke tan merkadu, nune’e povu baibain ne’ebé sei fa’an iha trotoar leten no dalan ibun, bele asesu ho di’ak.

Diretór Komisaun Justisa no Pás Dioseze Dili, Pé. Hermínio Gonçalves konsidera sidade Dili hanesan kapitál nasaun ne’e nian, ninia dezenvolvimentu ekonomia atu la’o di’ak, buat hotu rápidu, presiza tan merkadu, tanba ho  merkadu rua hanesan Taibessi no Manleuana, ema sei kontinua fa’an iha estrada ibun.

Amu hateten, Dili laran ne’e governu loke merkadu to’o sanulu di’ak liu-tan. Tuir Observasaun Komisaun Justisa no Pás katak, durante ne’e, ema sira ne’ebé fa’an iha dalan ninin ne’e hetan persegisaun maka’as hosi seguransa sivíl sira,  tanba hadau ema nia sasán, duni ema sira ne’e.

Situasaun ne’e parte Komisaun Justisa no Pás haree katak, ne’e la’ós soluasaun di’ak, tanba povu   ne’e ema, la’ós animál.

Atu hakotu situasaun ne’e, úniku resposta ne’ebé Parte Komisaun ne’e fó maka jestór merkadu iha Munisípiu Dili tenke loke tan merkadu nune’e povu baibain ne’e bele asesu.

Padre Herminio fó hanoin katak haree de’it ema sira ne’ebé oras ne’e fa’an iha merkadu, ne’e la’ós emprezáriu ka kompañia boboot sira mak mai fa’an, ema sira ne’e mesak povu baibain.

Ema sira ne’e nunka depende ba orsamentu jerál Estadu (OJE), OJE atu iha ka laiha, sira kontinua dudu nafatin sira nia karoxa, kontinua fa’an sira nia modo ka produtu iha merkadu.

Tuir loloos, iha nasaun ida, prioridade liu mak ema sira ne’e, nune’e bele ajuda mós sira dezenvolve sira-nia negósiu, nune’e to’o to’o tempu ruma sira nia negósiu ne’e sa’e karik, ita bele dehan povu ne’e tama ona ba iha inísiu sustentabilidade.

‘‘Komisaun Justisa no Pás preokupa ho situasaun ne’e, tanba ne’e husu ba governu liuhusi Ministériu Administrasaun Estatal, tún mai to’o Autoridade Munisipál Dili, atu tau konsiderasaun ba ida ne’e,’’ nia hateten ba Tatoli iha nia kna’ar fatin, kuarta (24/7).

Nia sujere mós atu loke merkadu kalan nian, nune’e bele fó mós serbisu ba seguransa sivíl sira hodi hein no aproveita hanorin mós ema sira ne’ebé fa’an, bainhira fa’an hotu hamoos kedas fatin ne’e no seluk-tan.

Amu husu atu loke merkadu tanba sirkulasaun osan ne’e iha merkadu no la’ós iha ema nia bolsu. Aleinde ne’e, bainhira la loke merkadu, povu baibain sei la sai estrañu iha nia rain rasik, tanba Xina mak okupa fatin hotu, inklui uma laran to’o trotoar leten.

Amu sujere mós katak di’ak liu reativa hikas merkadu iha Tasi Tolu, Becora no fatin sira seluk tan hanesan uluk.

Iha fatin seluk, negosiante Luís do Rego (56) ne’ebé loraik-loraik fa’an modo iha dalan ninia área Kampung Baru besik rotunda Comoro hateten, nia fa’an iha dalan ninin tanba iha merkadu fatin la to’o.

Aleinde ne’e, iha Dili laran merkadu rua de’it no dook liu, tanba ne’e dala ruma ema la hola ninia produtu.

Tanba ne’e, dalan di’ak liu ne’ebé nia hili hodi fa’an, maka dalan ninin, iha ne’ebá ema movimenta maka’as no rendimentu mós sufisiente atu bele sustenta  nesesidade família.

Jornalista: Cipriano Colo

Editór : Xisto Freitas

1 KOMENTÁRIU

  1. Lahos deit rekusrsu umanu mak sai difikuldades ba Timor Leste atu tama ASEAN. Buat barak tan mak sei halo Timor Leste atu susar tama ASEAN. Diak liu ita konsentra deit ba hamos lixu iha Dili laran duke ba sibuk fali atu tama ASEAN.
    Se diak liu molok atu tama hanesa membru ASEAN, uluk liu Timor Leste tenki sai uluk lai hanesa observador. Keta ansi atu tama kedas hanesa membru nakonu. Hadiak lai uluk uma laran depois mak ba hanoin fali buat seluk

HAKEREK NO HATÁN

Please enter your comment!
Please enter your name here