Povu Timor ne’ebé fó sira-nia direitu votu iha Konsulta Populár, 30 agostu 1999. Foto espesiál

DILI, 24 jullu 2019 (TATOLI)- Governu Timor-Leste liuhusi Ministeriu Negósiu Estranjeiru no Kooperasaun (MNEK), Diresaun Konsulár Protokolár, Serimoniál no mídia maka prepara selebrasaun ba komemorasaun 30 Agostu, loron Konsulta Populár.

“Hanesan ita hotu hatene, dia 30 agostu agora, halo ita-nia tinan 20 Konsulta Populár, ita-nia governu no  estadu hanoin katak ita presiza atu selebra, hodi hanoin fila fali loron ida ne’ebá,” hateten Diretór Jerál Asuntu Konsulár, Protokolár, Serimoniál no Mídia, Juvêncio Martins, ba Ajénsia TATOLI iha nia kna’ar fatin Praia dos Coqueiros, Quarta, (24/7/2019).

“Hanesan ita-nia Maun boot  (Xanana) fó sai ona iha nia mensajen, selebrasaun ida ne’e hodi orienta liu ba ita jerasaun foun atu nune’e bele hatene saida mak akontese iha tinan 20 liu ba, iha 30 de agostu 1999,” hatutan tan Diretór Juvêncio Martins.

Nia haktuir, atividade prepasaraun ba selebrasaun ne´e tuir estrutura organizasaun nian. Katak, iha Prezidente Komisaun Organizadora, Kay Rala Xanana Gusmão ho nia konselleiru, koordenadór jerál, vise-koordenadór no seksaun traballu. “Iha ne’ebá la’ós ita laran (timoroan de´it) mak halo festeju sira ne’e maibé konvida mós ita-nia bainaka sira iha li´ur hanesan xefe estadu, xefe governu”.

Nia mós esplika, konvida xefe estadu, prezidente repúblika mak sei konvite no xefe governu, primeiru-ministru mak sei konvite. Enkuantu, pesoa eminente ka figura boot sira sei konvida husi “Maun-boot Kay Rala Xanana Gusmão” mak hasai karta konvite.

“Atu akomoda sira mai ita prepara buat barak, hanesan seksaun sira ne’ebé ohin hau dehan ne’e, seksaun traballu prepara servisu, para oinsa bele hala’o festeju sira ne’e ho di’ak, tantu husi ha´u-nia parte hanesan vise koordenadór ba asuntu relasoes interna no protokolu,” haktuir tan diretór ne´e.

Kona-ba preparasaun ba komemorasaun, Diretór Juvêncio Martins hateten, prepara akomodasaun no servisu hothotu hosi simu bainaka sira mai.

“Ne’ebé hare’e ba hoteis ami halo ona survei (peskiza) ba iha 34 hoteis, ami bolu jerente hoteis sira mai ko’alia ho sira katak 30 agostu ita hotu nian, tanba ne’e ita hotu hamutuk para bele organiza malu halo didi’ak”.

“Seluk fali ba protokolu sira oinsa bele simu konvidadu sira ho di’ak, tau para ema kuandu fila, fila ho memória ida ne’ebé di’ak, katak ita tinan 20 ona, ita bele organiza buat ne’e ho di’ak, hanesan jestu d gratidaun ba ita-nia bainaka sira mai husi li´ur,” dehan diretór ne´e.

“Nune’e mós tempu hanesan ha´u dehan atu hodi ita-nia populasaun, liliu ba ita-nia jerasaun foun hodi hanoin fali loron ida ne’ebá; 30 agostu liubá tanba 30 agostu liubá depois Ian Martin hosi UN (Nasaun Unida) nian halo anúnsio iha dia 4 de setembro.  30 agostu ita halo ita-nia referendum konsulta populár, nia rezultadu fó sai iha dia 4 setembru,” nia lembra.

Diretór Juvêncio Martins informa tan katak iha komemorasaun tinan 20 Konsulta Populár ne´e no relembra fali 4 setembru sei iha “Marcha da Paz”. “Populasaun no joven sira ho motor hale´u sidade Dili, hanoin fali iha loron ida ne’ebá”. Hodi hatutan: “ Bainaka barak ita konvida, ema sira naton mai (30 agostu) no ASEAN laran ita konvida hotu”.

Maske nune´e, tuir diretór ne´e konfirma katak seidauk bele fó sai ofisialmente se mak sei mai no la mai iha komemorasaun loron Konsulta Populár,  30 Agostu ne´e. “Orsida lokraik ami reuniaun ida iha sekretariadu komisaun organizadora nian iha fronteira marítima nian, iha ne’ebá, ami husu bele fó sai ona ka lae, lista ne’ebé konfirmadu ona”.

Kona-ba atendimentu, Diretór Juvêncio Martins hateten: “Atendimentu ami prepara liliu ba liña inteira, hanesan parte oin protokolu, atu servisu ho sira, tanba ami-nia rekursu umanu la sufisiente, entaun ami rekruta estudante universitáriu hanesan UNTL, UNPAZ, UNDIL, hamutuk 130 pessoas para bele ajuda”.

Diretór ne´e haktuir tan katak otel sira iha Dili ne´e peskiza hotu ona no esplika ona mós ba otel na´in sira.

“Boot ne’e Timor Plaza, Hotel Timor,  Novo Turismo, Mantamo, Gólgota, Terra Santa,  boot liu mak The Ramelau, Beach Garden, otel ki´ikoan barak no hamutuk 34 otel; konvida sira mai ko’alia ho sira  para sira bele servisu di’ak, kooperasaun ho kolaborasaun ho ajente protokoli nian sei destaka ba iha otel ida ida, hodi servi ita-nia bainaka sira,” nia informa.

Diretór ne’e esplika liután, halo konfirmasaun ba bainaka sira, atu partisipa iha selebrasaun 30 de agostu nian se konfirmasaun mai sufisiente, entaun otel mós sufisiente, se konfirmasaun mai boot demais, ita tenke buka alternativa.

“Maibé ami hein ona data konfirmasaun prazu iha dia 15, liu tiha ona, ne’ebé ami orsida enkontru defini fali data foun ba konfirmasaun finál, se data to’o sira lá konfirma entaun sira la mai, entaun prontu ita taka ona, atu ita haree sira ne’ebé konfirma ona”.

“Entertantu, iha otel balu ami la konta, mais fatin sira ne’e fatin di’ak, Terra Santa Gólgota, rezidénsia foun sa’e ba Cannosa, Farol, uma balu mamuk ne’e alternativa ita bele foti,” tenik tan diretór ne’e.

Notísia relevante: http://www.tatoli.tl/2019/07/estudante-127-tuir-teste-iha-mnek-sai-protokolu-iha-komemorasaun-konsulta-popular/

http://www.tatoli.tl/2019/06/komemora-konsulta-popular-ho-programa-edukativu-kultural-no-rekriativu/

Jornalista: Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here