Kareta Estadu ne'ebé husi CI. Imajen/TATOLI

DILI, 25 jullu 2019 (TATOLI)-Tribunál Distritál Dili (TDD), ohin,  kontinua halo audiénsia julgamentu ba kazu “abuzu poder” no “pekulatu ba  uzu” kaman,  ne’ebé envolve arguida ho inisiál LVA ho ATS nu’udar ezekutivu iha Konsellu Imprensa (CI-sigla portugés) Timor-Leste.

Iha audiénsia julgamentu ne’e, TDD rona testemuña na’in neen (6) kompostu hosi testemuña  na’in haat (4) arola husi  Ministériu Públiku no na’in rua seluk arola hosi defensor ne’ebé fó asisténsia legal ba arguida nian rua (2).

Testemuña   na’in haat ne’ebé arola hosi MP ne’e; na’in ida nu’udar Diretór Administrasaun Finansa, Aprovizionamentu no Lojístika  ho inisiál EDC no ida seluk, Diretór Apoia Jurídiku no Liberdade Imprensa ho  inisiál ODA. Na’in rua seluk, mak ZJC nu’udar motorista ho ADS nu’udar ofisiál Rekursu Umanus.

Hodi Defeza nia parte arola testemuña na’in rua, kompostu hosi ADF nu’udar Diretor Komunikasaun Sosiál, Relasaun Institusionál no Kooperasaun ho mós AMG nu’udar pesoál apoia gabinete Prezidente CI.

Testemuña ODA deklara katak, momentu pedidu ida hosi arguida LVA tama duni ba nia kona-ba atu husu karreta Estadu uza ba Kupaun hodi fasilita lori nia oan ba halo tratamentu saúde, maibé momentu ne’ebá nia hanesan Diretor Ezekutiva Interinu asina tiha, mas liu minutu 15 nia laran nia bolu fali funsionáriu ida ne’ebé aprezenta pedidu ne’e hodi entrega hikas ba nia no la lori fali ba entrega ba arguida LVA hodi hein LVA mai direitamente fó pedidu. Nune’e, to’o lokraik, arguida LVA la ba, mas derrepente de’it, hateten testemuña ODA, arguida sira lori tiha ona karreta ho matrikula  06.378G ba Kupaun.

“Ha’u la asina no la aprova pedidu autorizasaun ba karreta  Estadu ba arguida na’in rua ne’e,” afirma ODA.

Ba Tribunál testemuña sira na’in haat ne’ebé arola hosi MP deklara katak, sira la iha koñesimentu verbal no eskrita hosi arguida na’in rua kona-ba pedidu utilizasaun patrimóniu estadu (Karreta Estadu) ba Kupaun, Timor Osidentál (NTT-sigla Indonézia), Repúblika Indonézia.

Hosi sorin seluk, JP nu’udar  testemuña no asume funsaun Fiskál Úniku CI nian responde ba TATOLI ohin iha TDD katak,  iha estutu CI nian ne’ebé hakerek iha artigu 39 hateten katak kuandu iha funsionáriu no diretór balu mak komete krime hanesan abuzu poder tenke lori ba tribunal.

“Agora kazu ne’e iha ona tribunal entaun ita hein de’it rezultadu ikus ba kazu refere tanba kazu ne’e prosesu hotu ona no hein halo alegasaun,” hateten JP.

Nia lia tun tan, alegasaun final ba kazu ne’e iha loron 30 jullu agora, ne’ebé kazu ne’e tomak kompeténsia tribunal nian no  hanesan Fiskál Úniku  mós hein de’it rezultadu.

Audiénsia julgamentu ne’e preside hosi Juiz Yude Pamungkas, Ministériu Públiku (MP) reprezenta hosi Prokuradór Adérito Tilman no arguida na’in rua hetan asisténsia legal hosi advogadu privadu, Celestina Afonso ho Elda Gomes.

Hahú Diskute Regulamentu Ba Uzu Patrimóniu Estadu

Responde ba jornalista sira iha TDD hafoin akompaña prosesu julgamentu ne’e, Paulo da Cruz Araújo, nu’udar membru CI, esklarese katak, to’o agora CI seidauk iha regulamentu rasik kona-ba uzu patrimóniu estadu, maibé normalmente utilizasaun patrimóniu karreta CI nian tenke halo pedidu no prienxe formuláriu utilizasaun.

Konselleiru Paulo da Cruz Araújo, esklarese katak, CI hanoin ona halo regulamentu ne’e iha 2017, maibé la konsege halo tanba CI konsentra ba implementasaun servisu ne’ebé Lei Komunikasaun Nu:5/2014, relasiona ho aprovasaun Konde Étika, halo lejizlasaun sira ba asegura promove liberdade imprensa no hatuur funsionamentu administrativa no rekursu umanu CI nian.

“Iha tinan 2018, ami la konsege halo tanba ita enfrenta empasse polítika no moris ho osan duo désimu,” hateten Paulo da Cruz Araújo, hodi dehan, iha tinan ne’e CI foin prosesu rekruta  asesór jurídiku ida (hanesan ema independente) mai hakerek dokumentu sira no produz lei internu. Infelizmente, iha 2018 la bele halo rekrutamentu tanba la iha orsamentu.

Nia mensiona tan, CI hanesan instituisaun ne’ebé foun, harii ho meja no kadeira mós la iha, tanba ne’e tenke halo servisu ba harii funsionamentu institusionál no mapamentu pesoál sira hodi asegura servisu hotu ne’ebé sai kompetensia CI nian tuir Lei haruka.

Nia informa tan, tinan ne’e sira foti ona jurídiku ida atu haree regulamentu barak hanesan apoiu jornalista sira nian, porezemplu, oinsá votu ba membru foun mai no iha tinan 2020 nian ne’e, prosesu ba eleisaun membru foun nian ba kada sesaun ne’e atu hala’o ona no halo konsultasaun.

“Fizikamente iha fulan Agostu, tinan ne’e, komesa prosesu hakerek regulamentu nian, ne’ebé ami hanoin importante duni,” hateten Paulo da Cruz Araújo.

Nia mos dehan as vezes iha dezafiu balu mosu iha instituisaun nian tanba laiha regulamentu ne’ebé mak bele regula buat hirak ne’e.

“Ami tenke haree ba buat barak hanesan patrimóniu estadu, iha barak ne’ebé tenke haree hotu ba dokumentu, katak oinsá kuandu sasán sira ne’e  aat  no oinsá mak halo manutensaun ne’e no presiza haree di’ak ba património uzu sira ne’e para regulariza ho di’ak, maibé la’ós ba karreta de’it, ba motorizada, komputadór no patrimóniu sira seluk ne’ebé ajuda servisu funsionamentu administrativa no polítika CI nian,” tenik Paulo da Cruz Araújo.

Jornalista  : Osória A. Marques

Editór        : Xisto Freitas

HAKEREK NO HATÁN

Please enter your comment!
Please enter your name here