Foto hamutuk entre Prezidente FFTL, reprezentante Telkomcel no Sekretáriu Estadu Juventude no Desportu, Nélio Isaac Sarmento. Imajen Tatoli/Hortençio Sanchez

DILI, 25 jullu 2019 (TATOLI)—Federasaun Futeból Timor-Leste hamutuk ho Telkomcel realiza jogu eskolár ho naran “FFTL-Telkomcel Cup” ne’ebé sei hala’o iha kada eskola sekundáriu hotu iha munisípiu sanulu resin tolu.

Eventu ne’e realiza atu tulun dezenvolvimentu futeból iha Timor-Leste nune’e bele loke foinsa’e sira-nia talentu no buka fini Selesaun Nasionál nian hodi reprezenta nasaun iha jogu internasionál sira.

Jogu refere, Telkomcel hala’o nia papél hanesan patrosinadór prinsipál hamutuk ho kompañia seluk hanesan Banku Mandiri, BRI, Pertamina Internasionál, Grupu NWTL, Fone Hause, TL Sport no seluk-tan.

Eventu refere sei hala’o dahuluk iha Munisípiu Liquiçá, 28 jullu tinan ne’e, inklui mós munisípiu seluk. Prezidente FFTL, Francisco Gerónimo hateten eventu ne’e hala’o tanba kooperasaun Telkomcel ho FFTL no koopera mós ho Ministériu Edukasaun Juventude no Desportu (MEJD).

Kompetisaun ne’e, FFTL sei asegura prosedimentu jogu nian tuir padraun internasionál, hahú hosi regra, dokumentu, arbitrajen no regulamentu ne’ebé uza tuir padraun FIFA  (The Fédération Internationale de Football Association) nian.

“Eventu ne’e ita hala’o ba dala rua ona. Tinan kotuk, ita hala’o de’it iha Dili. Maibé, tinan ida ne’e, lori mós ba munisípiu sira espesial de’it ba eskola sekundáriu sira. Bainhira sira joga iha munisípiu sai primeiru lúgar foin tau sira hamutuk iha Dili hodi joga fali,” dehan Francisco liuhosi konferénsia imprensa ne’ebé hala’o ohin iha salaun Xanana Sport Center, Bairro Formosa, Dili.

Orsamentu ba realiza jogu ne’e hamutuk rihun tolunulu resin. Kona-ba fasilidade, FFTL serbisu hamutuk ona ho Asosiasaun Futeból Munisípiu sira no eskola sekundáriu hotu iha munisípiu ida-idak. Tuir orariu, eventu ne’e sei hala’o iha loron sábadu no domingu.

Ba manán na’in sira iha munisípiu ida-idak sei simu prémiu tasa no osan. Enkuantu, jogu finál sei hala’o iha novembru mai ne’e iha Dili entre ekipa rua ne’ebé tama ba finál. Antes ne’e, iha tinan kotuk, FFTL no Telkomcel realiza eventu refere konsege hetan duni fini jogadór balun ne’ebé dadaun ne’e tama ona iha Selesaun Nasionál U-18.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here