Matebian João Bosco Batista Colo Batan

DILI, 24 jullu 2019 (TATOLI) – Jurista Pedro Apariçio Guterres, afirma katak, suspeitu sira ne’ebé mak oho João Bosco Batista Colo Batan iha Jogjakarta, Indonézia, kuandu halai ona mai Timor-Leste bele hala’o julgamentu iha Tribunal Distritál Dili (TDD) tanba entre nasaun ida idak iha ninia prinsípiu nasionalidade.

Advogadu Pedro Apariçio Guterres. Imajen/ Egas Cristovão

Prinsípiu nasionalidade katak nasaun ida idak iha ninia lei próteze ninia sidadaun, signifika sidadaun ida mak halo krime iha estranjeiru, nune’e haree mak lokal krime katak fatin akontese iha ne’ebé, maibé ba kazu oho malu entre timoroan sira iha Indonézia, se karik halai ona mai TL, labele deporta fali ba Indonézia tanba lei kódigu penal mós la permite.

Ba kazu Jogjakarta, katak Pedro Apariçio Guterres, iha indísiu forte envolve timoroan mak sai lezadu no arguido no kona ba prosesu hotu investigasaun mak hatene.

Notísia Relevante : Suspeitu Oho Bosco, Bele Hetan Pena Morte

Governu Sei Foti Medida Rigoroza Ba Estudante Sira Ne’ebé Envolve Iha Kazu Oho João Bosco

“Agora, ko’alia kona ba téknikamente depende ba Indonézia no TL, oinsá sira na’in rua ko’alia ba malu nee, katak benefísiu ou fasilita julgamentu iha Indonézia ka TL mak di’ak liu, maibé ita nia konstituisaun mós la permite atu halo julgamentu iha rai liur,” esplika Pedro Apariçio ba Ajénsia TATOLI, ohin, iha Tribunal Distritál Dili (TDD).

Nia hatutan, estadu TL mós tenke haree buat nee hodi labele haruka suspeitu sira ne’ebé mak oho Bosco ba fali Indonézia, se lae Estadu TL bele mai hatán fali iha TDD tanba fó fila fali nia ema ba Indonézia hodi tuir julgamentu.

“Hein katak suspeitu sira nee labele halai mai iha TL, se lae, bele difikulta prosesu hotu liuliu prosesu julgamentu iha Indonézia ka TL,” tenik Pedro Apariçio.

Pedro esplika, ema hotu hatene katak iha Indonézia aplika pena morte ba sidadaun sira ne’ebé mak komete krime droga no omisídiu, maibé iha TL laiha pena morte no pena ne’ebé naruk mak too de’it tinan 25. Tanba nee, husu Estadu tenke haree didi’ak buat hirak nee, atu lalika hamosu konfuzaun no kria problema.

Jurista José Pedro Camões. Imajen/Domingos Piedade Freitas

Iha biban seluk, tuir jurista José Pedro Camões katak, se suspeitu sira mak halai mai TL, iha problema uitoan ho TL no Indonesia. Tanba sei difikulta prosesu iha Indonézia.

“Ha’u hanoin posivelmente, tuir regra normal TL labele entrega suspeitu sira ba Indonézia tanba lei iha TL la permite no ida nee mós estadu nia obrigasaun ida,” hateten  José Pedro Camões.

Nia hatutan, hein katak suspeitu sira labele halai mai iha TL hodi labele difikulta prosesu hotu atu sira ne’ebé mak oho vítima sira bele hetan justisa ho loloos. Maibé, di’ak liu husik ba iha Polisia no intelijente iha rai laran nia servisu mak atu identifika suspeitu sira nee.

Nia esplika, kazu nee akontese iha Indonézia maka tenke  lao ho regra Indonézia nian no estadu ida nee iha obrigasaun mak atu kolabora no hein katak estadu rua nee kolabora malu di’ak liu tan hodi bele hetan serteza ho loloos no di’ak.

Notísia Relevante : Família Haloot Ona Bosco iha Semitériu Kiu-Tó’kô Masin

Jornalista : Domingos Piedade Freitas

Editór       : Francisco Simões

 

HAKEREK NO HATÁN

Please enter your comment!
Please enter your name here