Sekretariu Estadu halo enkontru ho Vise Ministru Administrasaun Estatál, Abilio José Caetano, iha Edifisiu MAE Caicoli Dili, ohin./ Imajen Media SEFOPE

DILI, 23 jullu 2019(TATOLI)-Sekretáriu Estadu Formasaun Profisionál no Empregu, (SEFOPE), Julião da Silva, informa,  SEFOPE sei fó apoiu tékniku no finanseira ba Ministériu Administrasaun Estatál (MAE) hodi konstrui obra Sede Suku sira, turizmu komunitáriu, Edifísiu Ofisiál Polisiamentu Komunitáriu, saneamentu públiku no seluk tan.

”’Agora daudauk SEFOPE identifika ona fatin ne’ebé atu halo obra ba hanesan OPS Liquiça iha Suku Leorema,  fatin turizmu  Railaku, buat sira ne’e hotu ami sei koopera hamutuk ho Estatál  hodi hala’o program ida ne’e,” hateten  Sekretáriu Estadu Julião da Silva, hafoin halo enkontru ho Vise Ministru Administrasaun Estatál, Abílio José Caetano, ohin, iha Edifísiu MAE Caicoli, Dili.

Tuir planu instituisaun rua ne’e sei hahú implementa programa kooperasaun servisu ne’e antes fin fulan Jullu 2019.

Governante ne’e komenta ninia parte iha rekursu umanu sufisiente atu implementa projetu hirak ne’e tanba formandu sira ne’ebé tuir hela formasaun iha sentru formasaun iha Senai Becora no Tibar Munisípiu Liquiça iha kapasidade atu ezekuta obra refere.

Projetu ne’e mós parte ida atu monstru kapasidade formandu sira hosi sentru formasaun ne’ebé maka tuir hela formasaun iha área konstrusaun sivíl, Karpintaria, eletrisidade no sira seluk tan.

Iha okaziaun hanesan, Vise Ministru Administrasaun Estatál hatete, projetu kooperasaun ne’e sei implementa mós iha Dili hanesan terminal Becora, Terminal Tasi-tolu, sintina públiku.

Abílio José Caetano dehan, parte rua sei estabelese nota entendimentu ida hodi fó kompeténsia ba autoridade munisípiu hodi implementa projetu ne’e.

Jornalista          : Osória A. Marques

Editór                : Francisco Simões

HAKEREK NO HATÁN

Please enter your comment!
Please enter your name here