Prezidente Parlamentu Nasionál, Arão Noé de Jesus da Costa Amaral. Imajen Egas Cristóvão

DILI, 24 jullu 2019 (TATOLI) – Prezidente Parlamentu Nasionál (PPN), Arão Noe de Jesus da Costa Amaral, informa agora dadauk pakote lejizlativa ne’ebé foin hetan aprovasaun iha finál globál, iha hela Komisaun B, C no D hodi halo redasaun finál hafoin manda ba Prezidente Repúblika (PR), Francisco Guterres Lú Olo hodi halo promulgasaun.

PPN fiar katak Xefe Estadu sei foti desizaun lalais ba pakote lejizlativa ne’ebé kompostu husi lei haat no rezolusaun ida.

“Ha’u fiar katak lei ne’e ba interese nasionál, Prezidente Repúblika sei foti desizaun lalais para atu solusiona situasaun ida nee”, tenik PPN ba jornalista sira iha Parlamentu Nasionál (PN), kuarta ne’e.

Bainhira Komisaun tolu ne’e aprezenta ona meza PN, mak sei enkamiña ba PR ‘Lu Olo’ no tuir Konstituisaun, Xefe Estadu iha loron 20 nia laran hodi desidi atu veta ka promulga.

“Sira (komisaun sira) sei aprezenta mai no bainhira ami haree katak loos ona, mak sei enkamiña ba Prezidente Repúblika. Ha’u hanoin komisaun sira sei aprezenta lokraik ne’e, maibé bainhira tékniku sira mai sedu sei haruka kedas no bainhira la biban, aban dadersan tuku 09.00”, nia akresenta.

Tuir konstituisaun artigu 88, kona-ba promulgasaun no veto, hateten iha loron 30 nia laran konta husi simu kualkér diploma husi PN sei promulgadu hanesan lei. PR iha kompeténsia atu  promulga ka veto, hafoin husu apresiasaun foun ho mensajen fundamentál.

Proposta ne’ebé hetan aprovasaun husi PN mak hanesan Proposta lei númeru 4/V (1a) – segunda alterasaun ba Lei nú.13/2005, 2 setembru kona-ba Lei Atividade Petrolífera, ho votu a-favór 41, kontra 23 no abstensaun 1.

Proposta Lei nú.5/V (1a) – segunda alterasaun ba Lei nú.9/2005, 3 agostu kona-ba Lei Fundu Petrolíferu, ho votu a-favór 41, kontra 23 no abstensaun 1.

Nune’e mós, Proposta Lei nú.6/V (1a) – primeira alterasaun ba Lei nú.8/2008, 30 juñu kona-ba Lei Tributária, primeira alterasaun ba Lei nú.3/2003, 1 jullu kona-ba Tributasaun Kontratante iha Bayu-Undan no Primeira alterasaun ba Lei nú.4/2003, 1 jullu kona-ba Dezenvolvimentu Petróleu iha Tasi Timor (Estabilidade Tributária), ho votu a-favór 42, kontra 23 no abstensaun 0.

No ikus mai, Proposta Lei nú.7/V (1a) – Rejime Laborál no Migratóriu Espesiál Aplikável ba Projetu Bayu-Undan, ho votu a-favór 42 no kontra 23 abstensaun 0.

Nune’e mós, Proposta Rezolusaun nú. 2/V (1a)-Ratifikasaun Tratadu  entre Repúblika Demokrátika Timor-Leste (RDTL) no Austrália, ne’ebé estabelese respetiva Fronteira Marítima iha Tasi Timor ho votu a-favór 42, kontra 23 no abstensaun 0.

Jornalista: Evaristo Soares Martins

Editór: Xisto Freitas 

Notísia Relevante: 

PN Aprova Ona Proposta Lei Haat iha Finál Globál

PN Aprova Rezolusaun Ratifikasaun Tratadu Entre RDTL no Austrália iha Finál Globál

 

HAKEREK NO HATÁN

Please enter your comment!
Please enter your name here