Arguido trafíku droga tuir julgamentu iha TDD, Kuarta (24/07/2019). Imajen/Domingos Piedade Freitas

DILI, 24 jullu 2019 (TATOLI) –Ministériu Públiku (MP) liuhosi audiénsia julgamentu, ohin, iha Tribunál Distritál Dili (TDD), alega pena prizaun tinan ida (1) suspende tinan tolu (3) ba arguidu krime tráfiku droga ho inisiál MBBA, MCS, MP, FQ no SA.

Prokuradór Rogério Viegas, ne’ebé reprezenta MP hateten, faktu sira ne’ebé mak mensiona iha akuzasaun prova hotu kedas. Tanba arguidu sira iha duni intensaun konsumu droga liuhosi sigarru, ho razaun ne’e mak Ministériu Públiku husu ba tribunál atu aplika pena prizaun tinan ida, suspende ba tinan tolu.

Rona tiha alegasaun MP nian ne’e, Defensór Públiku, Sergio Quintas,  ne’ebé fó asisténsia legál ba arguidu sira, hateten, arguidu sira nia aktu ne’ebé Ministériu Públiku akuza, laiha provas hotu tanba iha prosesu julgamentu laiha deklarasaun serteza ne’ebé deklara hosi sasin.

Defeza mós konsidera ba aktu ne’e hetan fasilitasaun hosi polísia sira, razaun arguida prinsipál halai to’o agora mós seidauk buka hetan.

“Ami defeza duvida ho akuzasaun sira ne’ebé mak iha, laiha faktu sira ne’ebé provas, tanba defeza fiar la iha sasin ida ne’ebé atu mai deskobre kona-ba kazu ne’e, apenas hosi polísia sira deit,” hateten Sergio Quintas, hodi husu  ba tribunál atu absolve arguidu sira hosi krime ne’ebé mak imputa ba.

Rona tiha deklarasaun hosi parte rua, tribunál adia fila fali julgamentu ba loron 07  Agostu, 2019 tuku 9:00 dadeer.

Audiénsia ne’e prezide hosi Juis, Jose Maria de Araújo, MP reprezenta Prokuradór Rogério Viegas, no arguidu sira hetan asisténsia legál hosi defensór públiku na’in tolu, Sergio Quintas, Jonas Henrique no ida seluk Defensór Públiku estajiáriu.

Tuir akuzasaun MP ba kazu ne’e katak arguidu MCS hetan liberdade kondisionál hosi prizaun Bekora iha fulan-marsu 2017, tanba antes ne’e komete krime fa’an no konsumu droga ho tipu methamphetamine/ sabu-sabu, ho kastigu tinan 7 fulan 6 iha prizaun.

Maibé depois hetan liberdade kondisionál, arguidu ne’e fila fali nia atividade kontinua fa’an no konsumu droga ho tipu ne’ebé hanesan.

Iha data la apuradu, maibé iha tinan 2017 arguidu sempre fa’an droga ne’e iha area Bidau no Fatuhada, Timor-Plaza laran. Katak iha momentu ne’ebá hasoru duni arguidu na’in 4 seluk, MBBA, MP, FQ no SA ba iha Timor-Plaza laran hodi sunu no konsumu liu hosi fuma sigarru.

Autos notísia ne’ebé prodús hosi MP katak, arguidu sira fan droga sabu-sabu ne’e la’ós de’it ba ema timoroan sira mesak, maibé fan mós ba ema estranjeiru sira, ho presu U$50.00 kada sedotan plástiku ki’ik ida.

Tipu droga ne’ebé arguidu sira fa’an no konsumu ne’e tipifikadu iha artigu 5 númeru 2 ne’ebé elabora espesifikasaun kona-ba droga methamphetamine/sabu-sabu.

Tanba ne’e Ministériu Públiku konstitui arguidu sira nu’udar koautór materiál ho forma konsuma da ba krime trafikante no atividade ilísita ba droga ne’ebé previstu no punidu iha artigu 7 númeru 1, konjuga artigu 9 alínea H, hosi lei númeru 2/2017 kona-ba kombate tráfiku no konsumu ilísitu ba droga.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here