DILI, 24 jullu 2019 (TATOLI)Ministru Estadu Prezidénsia Konsellu Ministru, Hermenegildo Augusto Cabral Pereira informa reuniaun Konsellu Ministru (KM) iha kuarta ne’e, autoriza pedidu Ministru Justisa, Manuel Cárceres hodi asina adezaun Timor-Leste (TL) ba Konvensaun Organizasaun Nasaun Unida (ONU), kona-ba akordu hosi Kompensasaun Internasionál.

“Pedidu ida hosi Ministru Justisa ba Konsellu Ministru hodi autoriza podér tomak, ba Singapura atu asina Konvensaun Nasaun Unida hodi fó solusaun ba disputa komersiál via mediasaun,” tenik Hermenegildo ‘Agio’ iha Palásiu Governu.

Governante ne’e dehan, Konvensaun ONU ba mediasaun ne’e, KM hatán hodi fó podér tomak ba Ministru Cárceres atu ba asina.

“Kuandu asina ona sei lori fali ba Konsellu Ministru, konvensaun ne’ebé asina ona hodi hatún ba Parlamentu Nasionál hodi halo ratifikasaun,” nia akresenta.

Entretantu, konvensaun ne’e adopta hosi Asembleia Jerál Nasaun Unida iha loron 20 dezembru 2018, ho objetivu atu garante ba estadu no ba organizasaun rejionál sira, hosi integrasaun ekonómika ba kuadru legál hosi liña fronteirísiu ne’ebé garante komprimentu hosi akordu ne’ebé ho predisaun ba mediasaun hanesan forma hosi rezolusaun eventuál ne’ebé disputa entre parte rua iha domíniu komersiál.

Konvensaun ne’e loke dalan ba mediasaun hosi disputa  ne’ebé mosu iha kontestu relasaun komersiál internasionál no ratifika ona hosi nasaun 150 resin inklui Nasaun Sudeste Aziátiku (ASEAN-sigla inglés) sira. Timor-Leste sei asina Konvensaun ne’e iha Singapura iha loron 7 agostu 2019.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here