Sekretáriu Jerál LFA, Alexandre Vong (karuk), akompaña husi Diretór Verifikasaun no Lisensa LFA, José Carvalho (loos) halo konferénsia imprensa. Imajen Tatoli: Hortencio Sanchez

DILI, 24 Jullu 2019 (TATOLI) – Sekretáriu Jerál Liga Futeból Amadora (LFA), Alexandre Vong, klarifika katak orsamentu hirak ne’ebé klube foun sira hatama ona iha konta LFA, bazeia ba artigu 62 ne’ebé konsagra ona iha regulamentu liga nian.

Membru fundadór LFA hato’o lia hirak ne’e, hodi responde esteitmentu ne’ebé Sekretáriu Estadu Juventude no Desportu, Nélio Isaac Sarmento, ne’ebé hateten katak LFA labele ezije klube foun sira hatama osan iha prosesu rejistrasaun atu kompete iha jogu Terseira Divizaun.

Nune’e, Alexandre realsa, iha artigu 62 regulamentu liga nia ko’alia klaru katak, prosesu administrasaun, inskrisaun ho osan $500, enkuantu $2.000 hanesan osan seguransa, nune’e bele ajuda LFA hodi realiza jogu.

“Kona-ba osan ida $2.000 ne’e sai hanesan uang jaminan (osan seguransa) ida, tanba bainhira ita ko’alia kona-ba sansaun disiplina, karik klube ne’e halo problema ruma nia garantia mak saida, entaun nia garantia mak osan ida ne’e”, tenik Alexandre Vong liuhosi konferénsia imprensa ne’ebé hala’o iha salaun Xanana Sport Center, Bairru Formoza, kuarta ne’e.

Tuir ezekutivu LFA ne’e, jogadór sira ne’ebé hetan ona kartaun árbitru hodi dirije jogu no entidade sira hotu ne’ebé organiza jogu presiza osan ruma.

Nia dehan, meiu ne’ebé LFA hala’o dadauk la’ós foin mak halo, maibé hahú kedan iha tinan 2016.

“Se de’it mak prátika ona Futeból iha Timor-Leste, nia hatene ona prosesu hotu Liga Futeból Amadora nian,” nia akresenta.

Eis Vise Prezidente LFA ne’e afirma tan, maski tinan rua liu-ba kotuk, Timor-Leste hasoru krize finanseiru maibé liga ne’e durante époka haat nia laran la’o di’ak tebes, husi parte klube, adeptu no patrosinadór sira kontinua investe no tau osan nafatin hodi nafatin dezenvolve futeból iha Timor-Leste.

Nune’e mós, nia dehan tan, LFA nakloke ba parte hotu nia krítika, no naksalak hotu ne’ebé durante ne’e mosu sei bele hadia bainhira kongresu.

Nia akresenta, bainhira mosu krítika barak, hanesan sinal ne’ebé pozitivu atu hakat ba oin hodi hamutuk lori dezenvolvimentu futeból diak liu tan.

Alexandre informa tan, dadaun ne’e iha ona ekipa ne’ebé hala’o hela servisu hodi prepara ba kongresu bazeia ba orientasaun Prezidente Ezekutivu LFA nian no kongresu ne’ebé hala’o sei nakloke ba entidade hotu ne’ebé durante ne’e partisipa iha mundu futeból hodi bele partisipa.

Jornalista: Hortencio Sanchez

Editór: Xisto Freitas

 Notísia Relevante: LFA Labele Ezije Klube Hatama Osan

HAKEREK NO HATÁN

Please enter your comment!
Please enter your name here