Logo UNITAL.

DILI, 24 jullu 2019 (TATOLI)—Graduadu 915 husi Universidade Oriental Timor Lorosa’e (UNITAL) ne’ebé gradua iha 31 Dezembru 2018 to’o ohin loron la simu diploma, tanba problema internu.

Problema ne’e, graduadu sira deside hodi hamosu petisaun ida atu aprezenta ba Parlamentu Nasionál hodi toma konsiderasaun no ajuda rezolve sira-nia problema ho universidade.

“Ohin ami marka prezensa iha Parlamentu Nasionál no entrega petisaun ne’e atu husu ajuda ba ami-nia aman, deputadu sira hodi bele ajuda hela ami-nia problema kona-ba ami-nia diploma”, dehan Reprezentante Graduadu UNITAL 2018, Jaimito Maulaka de Araujo, ba jornalista sira hafoin entrega petisaun ba Komisaun G iha uma fukun Parlamentu Nasionál, tersa (23/7/2019).

Nia hatutan: “Ami husu ba Parlamentu Nasionál liuhusi Komisaun G ne’ebé trata asuntu Edukasaun, Juventude no Sidadania atu bolu urjentemente fundadór UNITAL nian para bele tuur hamutuk”.

Nia konsidera, parte universidade kontinua fó informasaun falsa katak hahú iha loron 16-18 jullu 2019, graduadu UNITAL sira-nia naran sei públika sai iha Jornál da Repúblika maibé to’o agora laiha rezultadu.

Reprezentante graduadu ne’e haklaken, bainhira esforsu sira ne’e mak la hetan solusaun, sira sei uza alternativa ida de’it mak dalan justisa.

Ho dalan ida ne’e mak bele hetan solusaun di’ak liu ba problema sira ne’e tanba Konstituisaun RDTL artigu 26 fó dalan.

Nia afirma, problema loloos ne’ebé UNITAL enfrenta to’o agora ne’e mak fundadór sira nunka tuur hamutuk atu nomeia fali reitór definitivu.

Antes ne’e, UNITAL iha ona reitór ida maibé suspende. Problema boot ida mak fundadór balun nomea reitór foun maibé nunka halo konsulta ba malu.

“Sira fundadór na’in lima hanesan Maun Boot Lere Anan Timur, Cornelio Ximenes “Maunana”, Nickson, Matos no Nunura nunka tuur hamutuk atu rezeolve problema internál universidade nian maibé sira balun nomeia tiha ona reitor foun,” tenik nia.

Nia haktuir, graduadu UNITAL sente prejudikadu tanba mehi boot ne’ebé iha atu kompete iha merkadu traballu no kontinua hala’o estudu ba foti diploma mestradu tenke pendente tanba laiha diploma ne’ebé bele fasilita sira.

Notísia relevante: http://www.tatoli.tl/2018/12/unital-sei-gradua-estudante-915/

http://www.tatoli.tl/2018/12/unital-nomea-reitor-florindo-pereira/

Jornalista: Tomé Amado

Editór    : Rafy Belo

HAKEREK NO HATÁN

Please enter your comment!
Please enter your name here