Ministru MAP, Joaquim José Gusmão dos Reis, entrega sertifikadu ba formandu sira hafoin halo enseramentu ba Training of Trainer (ToT) iha salaun Fundasaun Kristal, Ohin.

DILI, 24 jullu 2019 (TATOLI)-Ministru Agrikultura no Peska (MAP), Joaquim José Gusmão dos Reis Martins, hatete Governu sei hahú sensu agríkola Timor-Leste  iha 12 agostu 2019.

“Hanesan natar na’in, to’os na’in, haki’ak manu, haki’ak fahi, haki’ak ikan tenke koopera ho di’ak tanba ita boot sira-nia informasaun importante tebes atubele halo planu di’ak ba futuru agríkola iha Timór-Leste”, ministru Joaquim José Gusmão dos Reis Martins, aviza hafoin halo enserramentu ba treinamentu ba treinadór (ToT) sira iha salaun Fundasaun Kristal, ohin.

Governante ne’e husu ba povu agrikultór liuliu autoridade munisipál, hahú husi aldeia to’o suku atu fó apoiu ka servisu hamutuk ho enumeradór sira hodi kontribui dadus loloos.

“Sensu ne’e importante tebes ba Timor-Leste, tanba foin primeira vez, depois hetan tiha independénsia, durante ne’e sensu umakain de’it, maibé agora ne’e sensu agríkola mós iha. Ha’u iha esperansa boot ho rezultadu sensu ida ne’e sei akontese ho di’ak”, nia salienta.

Iha ámbitu treinamentu, ministru fó parabéns ba partisipante sira tanba bele tuir treinamentu durante loron ualu nian laran, nune’e bá oin bele sai fali treinadór hodi fó fali formasaun ba enumeradór no supervizór hamutuk 2.584 iha munisípiu hotu inklui Rejiaun Administrativu Espesiál Oekusi Ambenu (RAEOA) .

Tuir ministru katak servisu sensu agríkola todan tebes, maibé vale, tanba ne’e nia husu ba enumeradór ho supervizór atu servisu ho di’ak.

Hafoin treinamentu, ministru MAP ho nia komitiva entrega mós sertifikadu ba partisipante sira.

Antes ne’e, planu Diresaun Jerál Estatístika Ministériu Finansa no Ministériu Agrikultura no Peska atu realiza sensu agríkola ba dahuluk iha Timor-Leste iha marsu-abríl, maibé lakonsege hala’o no muda fali mai iha juñu-jullu, maibé ladauk hahú, nune’e sei  halo iha 12 agostu 2019.

Notísia relevante : Treinadór 200 Ba Sensu Agríkola 2019 Partisipa ToT

Sensu Agríkola 2019 Realiza Fali Iha Juñu-Jullu

Jornalista: Antónia Gusmão.

Editora : Maria Auxiliadora 

HAKEREK NO HATÁN

Please enter your comment!
Please enter your name here