Sekretáriu Estadu ba Asuntu Kombatente Libertasaun Nasionál Gil da Costa Monteiro 'Oan Soru'. Imajen António Goncalves

DILI, 24 jullu 2019 (TATOLI)-Sekretáriu Estadu ba Asuntu Kombatente Libertasaun Nasionál, Gil da Costa “Oan Soru”, informa nia parte seidauk simu proposta husi rezidente suku Rotutu, postu administrativu Same Villa, munisípiu Manufahi relasiona levantamentu 20 agostu 1982.

“Hau seidauk simu sira-nia dokumentu, bainhira ha’u simu ona dokumentu, maka ha’u foin halo komentáriu”, Sekretáriu Estadu hatete ba Tatoli hafoin reuniaun Konsellu Ministru iha Palásiu Governu, ohin.

Foin lalais ne’e, iha lansamentu programa Naroman ba Suku ne’ebé halo husi Sekretáriu Estadu Komunikasaun Sosiál (SEKOMS) iha suku Rotutu (20/07), liuhusi diálogu komunitáriu, rezidente Rotutu husu ba Governu liuhusi SEKOMS, Merício Juvinal dos Reis “Akara” atu hato’o hela ba Sekretáriu Estadu ba Asuntu Kombatente Libertasaun Nasionál atu tau konsiderasaun ba levantamentu Rotutu ne’ebé akontese iha 20 agostu 1982.

Abitante suku Rotutu, Amorino Mendes, husu atu fó valorizasaun ba levantamentu ne’e, tanba haree iha Krarás-Vikeke, Marabia, Mausiga-Dare, rekoñese ona no iha Rotutu, halo ona serbisu lubuk ida hodi hatetuk ona kampu, nune’e husu atu Sekretáriu Estadu ba Asuntu Kombatente Libertasaun Nasionál bele toma mós atensaun ba levantamentu 1982 ne’e.

Amorino relata, levantamentu  20 agostu 1982 ne’e, konsidera nu’udar partisipasaun husi suku Rotutu nian, tanba momentu ne’e sira hetan torturasaun husi militár Indonézia no ema husi suku ne’e barak liu desterra bá Ataúru, tanba ne’e maka husu atu Estadu rekoñese no dignifika loron ne’e.

“Ami hatetuk ona kampu hodi hahú halo levantamentu ba ida ne’e, hodi fó Estadu rekoñese tanba ne’e ami husu atu Estadu bele finansia hodi harii monumentu ida liuhusi fatin ne’ebé maka ami prepara ona”, Amorino katak iha diálogu refere.

Hatán ba pedidu ne’e, SEKOMS, Merício Juvinal dos Reis “Akara”, hatete iha ámbitu diálogu ne’e katak preokupasaun ne’e sei hato’o ba parte kompetente atu toma atensaun.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here