DILI, 24 jullu 2019 (TATOLI)-Organizasaun Naun Governamentál (ONG) sira konsidera fronteira marítima ne’e kestaun interese nasionál la’ós interese bankada partidu ida ka rua nian iha Parlamentu Nasionál.
“Ita konsidera prosesu luta fronteira marítima Timor ho Australia ho susesu maun Xanana ho nia ekipa no ema hotu determina iha laran, agora ita determina hotu tiha, ita atu halo de’it aprovasaun tanbasá mak tenke retira, ida ne’e sai mós dúvida ida mai ami,” afirma Diretór NGO Luta Hamutuk, José Alves da Costa, ohin, ba Ajénsia TATOLI, Faról, Dili.
Nia hateten, desizaun bankada opozisaun FRETILIN nian hodi vota kontra Ratifikasaun Tratadu Fronteira Marítima ne’e normal no sei la fó impaktu ba prosesu ratifikasaun iha futuru, maibé ba asuntu nasionál, timoroan hotu presiza fó kontribuisaun.
“Ratifikasaun FM sei avansa nafatin ita espera ho prezensa maun boot Xanana, sei influensia tebes Parlamentu no Governu Austrália fó sira nia apoiu tomak iha momentu ida hanesan ne’e,” hateten José Alves da Costa.
Tuir José Alves da Costa, bainhira fronteira tasi definidu ona, Timor sei dezenvolve rikusoin sira hodi apoiu prosesu dezenvolvimentu nasaun nian.
Iha biban seluk, Diretór ONG Belun, Luis da Costa Ximenes, kontinua rekomenda ba lideransa nasionál atu hametin unidade no servisu hamutuk dezenvolve nasaun no povu nia moris di’ak.
Proposta ne’ebé hetan aprovasaun husi PN mak, Proposta lei númeru 4/V (1a) – segunda alterasaun ba Lei nú.13/2005, 2 setembru kona-ba Lei Atividade Petrolífera, ho votu a favór 41, kontra 23 no abstensaun 1.
Proposta Lei nú.5/V (1a) – segunda alterasaun ba Lei nú.9/2005, 3 agostu kona-ba Lei Fundu Petrolíferu, ho votu a favór 41, kontra 23 no abstensaun 1.
Nune’e mós, Proposta Lei nú.6/V (1a) – primeira alterasaun ba Lei nú.8/2008, 30 juñu kona-ba Lei Tributária, primeira alterasaun ba Lei nú.3/2003, 1 jullu kona-ba Tributasaun Kontratante iha Bayu-Undan no Primeira alterasaun ba Lei nú.4/2003, 1 jullu kona-ba Dezenvolvimentu Petróleu iha Tasi Timor (Estabilidade Tributária), ho votu a favór 42, kontra 23 no abstensaun 0.
No ikus mai, Proposta Lei nú.7/V (1a) – Rejime Laborál no Migratóriu Espesiál Aplikavel ba Projetu Bayu-Undan, ho votu a favór 42 no kontra 23 abstensaun 0.
Nune’e mós Proposta Rezolusaun nú.2/V (1a)-Ratifikasaun Tratadu entre Repúblika Demokrátika Timor-Leste (RDTL) no Austrália, ne’ebé estabelese respetiva Fronteira Marítima iha Tasi Timor ho votu a-favór 42, kontra 23 no abstensaun 0.
Jornalista : Nelson de Sousa
Editór : Francisco Simões