Avansadu Ponta Leste tenta hadau bola husi defeza Aitana hodi pele ultrapasa ba rede Aitana. Imajen: Mídia-LFA

DILI, 24 jullu 2019 (TATOLI) – Ekipa Aitana susesu dudu sai armada Ponta Leste hosi Tasa 12 Novembru, ho rezultadu golu 2-1, liuhosi jogu ne’ebé hala’o iha Estádiu Munisipál Díli, ohin lorokraik.

Nune’e, husi derrota ne’ebé Ponta Leste hetan, obrigadu ekipa ne’e tenke termina ona nia viajen jogu iha Tasa 12 Novembru, enkuantu ninia adversáriu Aitana hakat ba faze kuartu finál.

Hafoin ramata jogu, Treinadór Aitana, Salvador da Silva espresa nia sentimentu ho vitória ne’ebé nia ekipa hetan, no nia iha esperansa boot katak jogu tuir mai sira sei manán tan.

“Ha’u sente kontente tebes, ohin ha’u nia ekipa bele manán. Ida ne’e mak dehan jogu la haree ba Primeira Divizaun no Segunda Divizaun. Ohin ami manán ona fiar katak ami-nia espíritu komesa sa’e ba beibeik no ami sei manán tan iha jogu tuir mai”, dehan Assala iha Estádiu Munisipál Díli, kuarta ne’e.

Golu ne’ebé Aitana prodúz liuhosi jogadór Ricardo Mendonça (7) iha minutu 17, Miguel Ximenes (19) iha minutu 52, enkuantu golu úniku husi Ponta Leste prodúz hosi jogadór estranjeiru, Veh Donald (23) iha minutu 45+2.

Iha sorin seluk, treinadór Ponta Leste, Eduardo Pereira konfesa katak, estratéjia jogu ne’ebé jogadór sira halo, nia mak tau duni tanba Ponta Leste foku liu-ba Liga Futeból Amadora (LFA).

“Ami ohin la manán ne’e laiha buat ida. Ami foku liu de’it ona ba Liga”, tenik Eduardo.

Nia akresenta, diferente loron hira de’it Ponta Leste tenke joga iha LFA tanba ne’e nia tenke assegura jogadór prinsipál sira hodi bele joga bainhira Ponta Leste hasoru Ultramar iha domingu mai ne’e.

Antes ne’e, Aitana hanesan ekipa dahuluk sai kampiaun ba Tasa 12 Novembru iha 2015 bainhira halakon armada DIT FC, ho rezultadu golu 2-1, enkuantu Ponta Leste mós sai ona kampiaun ba Tasa hanesan iha époka 2016 bainhira halakon adversáriu Cacusan liuhosi penalidade.

Entretantu, hosi époka 2017 to’o 2018, Atlético Ultramar mak sai kampiaun no dadaun ne’e Ultramar iha ambisaun maka’as hakarak sai kampiaun dala ida tan.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here