Estudante primeiro ano EBFC Oelulan na'in 53 hala'o ezame iha sukaer hún, hafoin ahi han armajen no sala eskola nian iha loron (23/07). Foto José Sequeira

DILI, 24 jullu 2019 (TATOLI)—Hafoin ezame loron daruak iha tersa (23/7), kuaze tuku 13: 00, ahi han sala ida no armajén iha Eskola Bázika Filiál Katólika (EBFC-sigla portugés) Oelulan, Aldeia Noke, Suku Naimeko, Sub-rejiaun Pante Makassar, Rejiaun Administrativa Espesial Oé-Cusse Ambeno (RAEOA).

Estudante primeiro ano EBFC Oelulan na’in 53 hala’o ezame iha sukaer hún, hafoin ahi han armajen no sala eskola nian iha loron (23/07). Foto José Sequeira

Koordenadór EBFC Oelulan, Orianus Octovianus Ta’Opan, ba Tatoli via telefónema, kuarta ne’e, haktuir, inséndiu ne’e akontese bainhira profesór no alunu sira fila hotu ona ba uma.

Nia konta tuir katak, hafoin hetan informasaun hosi komunidade, koordenadór ne’e to’o kedas iha fatin akontesementu hamutuk ho profesór sira seluk inklui komunidade ne’ebé besik maibé la konsege salva sasán sira iha armajen laran inklui kadeira no meza.

Kona-ba motivu hosi inséndiu ne’e, Koordenadór eskola seidauk hatene loloos, maibé ahi han armajen, ne’ebé sala ida iha armajen laran durante ne’e alunu primeiro ano hamutuk 53 uza ba prosesu aprendizajen inklui uza ba ezame horisehik.

Ho situasaun ne’e, iha ezame loron datoluk ohin, estudante primeiro ano obrigadu tenke tuur iha ai-hún, tanba úniku sala ida ne’e mak durante ne’e sira uza.

Kondisaun eskola EBFC Oelulan ne’ebé mutuk tanba inséndiu iha loron (23/07). Foto José Sequeira

Aleinde kadeira no meza, ahi mós han mutuk fasilidade hotu ne’ebé durante ne’e uza ba merenda eskolár hanesan sanan, tasu, bikan, kanuru, kopu, balde inklui mangeira ne’ebé durante ne’e uza hodi dada bee ba eskola.

Durante ne’e, Orianus informa, parte eskola seidauk dada eletrisidade ba armajen laran, tanba ne’e koordenadór ne’e seidauk hatene loloos ahi ne’e mai hosi ne’ebé.

Armajen ne’e taka ho duut manulain no didin ho kalen, viziñu ho komunidade ida kuaze metru 10.

Koordenadór ne’e esplika mós katak, hafoin akontesimentu, autoridade lokál sira haree diretamentu no preokupa ho situasaun ne’e.

“Husu ba Ministériu Solidariedade Sosiál no Inkluzaun, bele ajuda kalén, meza, kadeira inklui fasilidade merenda eskolár nune’e bele normaliza hikas prosesu aprendizajen ba alunu primeiro ano, ne’ebé oras ne’e ezame iha ai-hún,”  Orianus sujere.

Nune’e mós, Inspetór hosi Komisaun Nasionál Edukasaun Katólika (KONEKTIL) ne’ebé destakadu iha RAEOA, José Sequeira ba Tatoli via telefónema, hateten horisehik nia to’o kedas iha fatin akontesimentu no koordena kedas ho Pároku Parókia São Miguel Arcanjo Padiae, Padre Carlos de Deus, ne’ebé orienta ona atu buka solusaun ba dezastre ne’e, liliu oinsá fasilita prosesu aprendijazen estudante sira-nian.

Inspetúr ne’e mós koordena ona ho parte Ministériu Solidariedade Sosiál no Inkluzaun (MSSI) Rejiaun Administrativa Espesiál Oé-Cusse Ambeno no hetan ona orientasaun oinsá hato’o karta formál nune’e parte relevante bele fó apoiu.

Eskola Bázika Filiál Katólika Oelulan, hahú hosi primeiro ano to’o sesto ano, ho totál estudante hamutuk 246, profesór permamente na’in 4, kontratadu na’in 4, inklui voluntáriu na’in 2.

Jornalista: Cipriano Colo

Editór : Xisto Freitas

HAKEREK NO HATÁN

Please enter your comment!
Please enter your name here