Pesoál saneamentu dasa hela fo’er. Foto/Google.

DILI, 24 jullu 2019 (TATOLI)- Autoridade Munisípiu Dili iha ona projesaun ba programa manutensaun no hadi’a jardín   sira iha Dili laran iha  tinan orsamentu 2020.

Adjuntu Autoridade Munisípiu Dili, Jose F. X. Smith. Imajen/Ozoria A. Marques

Adjuntu Autoridade Munisipál Dili, José F.X. Smith, informa katak, iha tinan rua ikus ne’e, difisil tebes ba Munisípiu Dili atu halo manutensaun ba jardín  sira iha kapitál nasaun ne’e tanba limitasaun orsamentu no rekursu umanu.

“Kuandu orsamentu estadu lao normál ona, entaun ita bele haree kapitál menór no kapitál dezenvolvimentu hodi bele rezolve problema manutensaun ba jardín sira iha Dili laran,” informa José Smith ba Ajénsia Tatoli, ohin, iha nia servisu fatin, Administrasaun Postu Administrativu Dom Aleixo, Dili.

Nia tenik, ho impasse polítika ne’ebé mosu husi tinan 2017-2018 no to’o mai inísiu 2019 afeta maka’as ba prestasaun servisu administrasaun nian,  tanba moris ho orsamentu duo désimu ezekuta de’it ba bem servisu no vensimentu, nune’e labele ezekuta ba kapitál menór no kapitál dezenvolvimentu.

“La’ós ami  laiha planu atu halo, maibé ita enfrenta difikuldade iha ezekusaun orsamentu duo désimu,” afirma José Smith.

Smith informa tan, iha tinan ne’e, sira komesa tau ema no hein ona jardín balun no mós iha ona kompañia balu ne’ebé mak hamoos jardín hirak iha Dili laran nune’e komesa instala ona hariis fatin sira iha kada jardín.

“Agora daudaun ne’e ita iha ona orsamentu ba hirak ne’e mezmu iha limitasaun tebetebes, maibé ha’u hanoin suficiente ona,” José Smith hateten.

Jornalista : Osória A. Marques

Editór       : Francisco Simões

HAKEREK NO HATÁN

Please enter your comment!
Please enter your name here