Manfestasaun MUTL kontra Parlamentu Nasionál iha fulan Outubru 2018. Imajen/Dok.Espesiál

DILI, 23 jullu 2019 (TATOLI) – Tribunál Distritál Dili (TDD), ohin, liuhusi desizaun finál fó pena admoenstrasaun (peringatan) ba arguido nain lima nu’udar membru MUTL (Movimentu Universitariu Timor-Leste) tanba provas hatudu arguido sira organiza halo manifestasaun hasoru Parlamentu Nasionál iha tinan kotuk.

Iha prosesu nee, tribunal mós prova faktu husi númeru 0186/18.PEDDIL, Ministériu Públiku nian, ba iha prosesu komún ne’ebé rekere atu hala’o julgamentu liuhusi tribunál singular tuir artigu 236 hosi kódigu prosesu penal.

Arguido ho inisiál MDSP alias maudia, estudante Universidade Dili (UNDIL),  arguido ASX estudante  UNITAL, arguido LGDS  estudante  UNTL, arguido FS estudante UNTL  arguido NBX alias Lai-Kere  iha UNTL.

Tribunal haree katak arguido sira iha indísiu sufisiente, katak iha loron 9 fulan Novembru,  siraorganiza manifestasaun iha kampus sentrál UNTL ne’ebé besik malu ho edifísiu Parlamentu Nasionál.

Iha karta komunikadu imprensa husi Movimentu Universidade Timor-Leste (MUTL), iha loron 25 fulan Outubru 2018, arguido na’in lima nee mak asina hanesan portavós ba atividade refere.

Iha momentu ne’ebá autoridade seguransa fó avizu ba manifestante sira atu muda fatin manifestasaun husi kampus sentrál ba kampus ekonomia, maibé arguido na’in lima la halo tuir.

Arguido MDSP deklara katak polisia kaptura nia ho maluk estudante sira tanba la halo tuir avizu seguransa sira nian, nune’e mós arguido na’in hat seluk.

Komandante operasaun Munisípiu Dili, Inspektór Xefi, Bernadino Lemós, ne’ebé sai mós hanesan komandante operasaun ba Munisípiu Dili, no responsabilidade tomak ba operasaun fó avizu atu hakiduk dala tolu ba kotuk, maibé arguido sira la halo tuir  avizu no orden husi komandante operasaun ne’e.

Konsekuénsia direita no nesesáriu husi hahalok arguido sira nian nee hamosu inkomprementu ba orden autoridade seguransa  nian no movimentu públiku.

Arguido na’in lima prienxe duni nu’udar koo-autor material ho forma konsuma da  ba krime ida hosi desovidensia, ne’ebé previstu no punidu  iha artigu 244 númeru 01,  no artigu 30 númeru 2 hosi kódigu penal Timor-Leste nian.

Aléinde nee tribunal mós konsidera hotu arguido sira nia konfisaun, katak arguido sira la nega kona-ba faktu. Katak motivu hosi manifestasaun nee atu hatudu ba Parlamentu sira oinsá bele rona povu nia halerik realidade.

Julgamentu nee prezide hosi Juis Maria Solana, Ministériu Públiku reprezentante Prokuradór Claudino do Rosário, no  arguido sira hetan asisténsia legal husi advogadu privadu Julio da Silva.

Jornalista          : Domingos Piedade Freitas

Editór                : Francisco Simões

HAKEREK NO HATÁN

Please enter your comment!
Please enter your name here