CPLP

DILI, 22 jullu 2019 (TATOLI)-Timor-Leste liuhusi Ministériu Negósiu Estranjeiru no Kooperasaun (MNEK) partisipa XXIV reuniaun ordinária Konsellu-ministru iha Mindelo, Cabo Verde ho tema “ A mobilidade como factor de coesão e construção de cidadania iha CPLP”. CPLP ne´e katak komunidade husi país sira ho lian portugés (sigla portugés).

“Ami iha ona informasaun, após reuniaun Konsellu-ministru, iha pontu tolu. Mobilidade kona-ba sidadania nian, iha CPLP ne’e sei iha debate publiku no ekipa halo estudu tan; asuntu ne’e sei lori ba Konsellu-ministru husi Angola, kuandu Angola asumi prezidénsia protempore,” hateten Diretór Jerál Asuntu CPLP, Avelino Fernandes Ximenes Pereira ba Ajénsia TATOLI, iha nia Edifísiu MNEK, Praia dos Coqueiros, Dili, segunda (22/07/2019).

Nia esplika, mobilidade akadémika, mobilidade sidadania liga ho kontextu Timór nian, la´ós Timór de´it mak enfrente maibé país seluk mak enfrenta.

“Tanba ne’e mak iha modalidade oioin, ida vistu kurtu durasaun, estadia temporária. Ita presiza estudu; iha komplexidade oituan, presiza estudu kle´an para ita bele sinkroniza ho ita-nia lei interna,” dehan Diretór Avelino Fernandes.

Nia haktuir, iha reuniaun kona-ba mobilidade enjerál ne’e dala tolu ona, iha Lisboa, foin dadauk iha Mindelo, Cabo Verde. Nia esplika tan katak: “Ita-nia situasaun reál interna nian, oinsa akordu ne’e iha aliñamentu tuir normas internasionais mas enjerál ita haree iha sinkronizasaun, iha aliñamentu ho normas internasionais, ezemplu: norma kona-ba aviasaun sívil kuaze ba mobilidade hanesan, kondisaun reál timór nian, ezemplu atu kontrolu presiza fasilidade, ezemplu makina Ray-X ne’e, no ho dokumentu sira hanesan fronteira ita seidauk iha, ita iha maibé nia kapasidade ki’ik”.

Diretór Avelino Fernandes hateten katak husi migrasaun Ministériu Interiór nian planeia ona atu hasa’e nia kapasidade atu halo revitalizasaun tanba ne’e país idaidak, liliu ita timór nia kondisaun atu aplika hotu kedas akordu ne’e. “Entertantu, hau hanoin ita sei fazeadamente quer dizer ba kurtu durasaun ba estudu, exemplu ita bele, mas ba sidadaum enjerál parese ita em fazeadamente pois mak ita ba iha ne’ebá,” nia akresenta.

Organizasaun luzofona kompostu husi Angola, Brasil, Cavo Verde, Guiné Bissau, Guiné Equatorial, Portugal, Moçambique, São Tomé e Princípe no Timor-Leste.

Jornalista:   Nelia Fernandes

Editór     : Rafy Belo

HAKEREK NO HATÁN

Please enter your comment!
Please enter your name here