Seksaun IT-PNTL entrega ekipamentus informatika ne’ebé aat ba seksaun patrimoniu estadu. Imajen/PNTL

DILI, 23 jullu 2019 (TATOLI)- Seksaun Information Technology (IT) Komandu Polísia Nasional Timor-Leste (PNTL), ohin, entrega ekipamentu informátika sira ne’ebé kondisaun aat ona (keimadu) ba seksaun Patrimóniu Estadu Ministériu Finansa.

Seksaun Patrimonio Estadu no IT-PNTL rekolla hela sasan informatika ne’ebé aat iha Komandu PNTL. Imajen/PNTL

Informasaun ne’ebé Ajénsia TATOLI asesu husi Portal Komandu PNTL, www.pntl.tl relata katak, totál ekipamentu eletrónika ne’ebé seksaun Patrimóniu Estadu foti maka hanesan, CPU hamutuk 81, Monitor (27), UPS (49), Mouse (25), Keyboard (89), Laptop (10) no Printer hamutuk 16.

Responsavel Rekollamentu patrimóniu Estadu, José Paulo Noronha esplika, bainhira sasán estadu nian aat ka uza liu ona tinan lima ba leten tuir lei liña ministériu sira koordena ho patrimóniu estadu hodi ba foti no haree ekipamentu sira ne’ebé sei di’ak bele utiliza ka halo leilaun hodi hatama fali osan ba kofre estadu.

Alende ida ne’e, ba ekipamentu sira ne’ebé labele uza ona sei rai hotu iha armazena patrimóniu Estadu iha Tasi Tolu ,Dili.

Ekipamentu eletrónika hirak ne’ebé husi parte seksaun IT-PNTL entrega ho kondisaun grave tebes, maibé desizaun atu halo destruisaun ou lae, ne’e kabe kompeténsia superior Patrimóniu Estadu nian mak sei haree.

Nia hatutan, ba karreta no motór husi liña ministériu sira ne’ebá maka aat ona inklui Komandu PNTL nian parte patrimóniu Estadu sei foti hotu.

Antes ne’e, Primeiru Ministru, Taur Matan Ruak, preokupa kada tinan Governu Timor-Leste gasta osan tokon $20 hodi halo manutensaun ba karreta estadu. Tanba ne’e Xefe Governu fó sai ona sirkulár ida hodi husu liña ministériu regula ba utilizasaun sasán estadu ho di’ak.

Jornalista          : Eugénio Pereira

Editór                : Francisco Simões

HAKEREK NO HATÁN

Please enter your comment!
Please enter your name here