Vice Ministra Finansa, Sara Lobo Brites. Foto/Jogerjo Guterres.

DILI, 23 jullu 2019 (TATOLI)-Ministra Finansa ein ezersísiu, Sara Lobo Brites, hatete kreximentu ekonómiku Timor-Leste nian daudaun ne’e rekupera hikas ona tanba ezekusaun Orsamentu Jerál Estadu (OJE) 2019 la’o ho di’ak.

Sara Lobo rekoñese katak iha 2017 to’o 2018, kreximentu ekonómiku rai-laran tun tanba mákina Estadu sustenta de’it ho orsamentu duodésimu.

“Ha’u dehan rekupera filafali tanba Governu iha orsamentu ne’ebé bele ezekuta, tanba ekonomia depende ba orsamentu Estadu, entaun rekupera iha sentidu Governu komesa re ativa fali ho Orsamentu Jerál Estadu no ekonomia rai-laran bele sa’e filafali, tanba Governu bele selu filafali kompañia sira fornese bens no servisu ba Estadu no sira bele selu sira-nia traballadór, entaun ekonomia bele movimenta fali”, Sara Lobo afirma iha Parlamentu Nasionál, ohin.

Tuir relatóriu foun Banku Mundiál nian ne’ebé fó sai katak kreximentu ekonómiku iha Timor-Leste sei aselera to’o porsentu 3.9 iha 2019 no iha 2020 bele to’o porsentu 4.6.

Relatóriu ekonómiku Timor-Leste iha abríl ne’e hatudu katak rekuperasaun ida ne’e sei hetan apoiu husi despeza públika ne’ebé maka’as, no mós konfiansa husi konsumidór no negósiu ne’ebé hafoun filafali.

Sara dehan : “Loos duni, relatóriu Banku Mundiál sira prevee katak ho situasaun iha tinan 2018 ne’ebé maka orsamentu momentu ne’ebá la aprova no halo ita-nia ekonomia kontrasaun katak kreximentu ekonómiku menus momentu ne’ebá, maibé agora ita iha tiha orsamentu 2019 nian no ezekuta daudauk no sira prevee katak rekupera filafali. Sira (Banku Mundiál) loos tanba ezekusaun daudaun ne’e di’ak hela”.

Governante ne’e hatutan, porsentu ne’e nu’udar estimativa ne’ebé mai hosi Banku Mundiál no parte Governu mós sei sukat ida ne’e (kreximentu ekonómiku), maibé ne’e sei bele akontese kuandu iha fim do ano.

Tuir liña orientasaun ba elaborasaun proposta orsamentu 2020-2023, Governu nia alvu iha 2020 hasa’e ba porsentu hitu, maibé atuál Vise-Ministra Finansa dehan seidauk bele define loloos tanba daudaun ne’e sei iha faze preparasaun ba OJE tinan oin.

“Alvu Governu nian hakarak iha tinan 2020 kreximentu ekonómiku aumenta ba porsentu hitu no persentajen ne’ebé mak Governu alvu, depende ba montante hira maka atu tau iha OJE 2020. Se tau montante ida mais ou menus hanesan agora, pur volta biliaun 1,3 to’o biliaun 1,4 ne’ebé bele prevee katak iha tinan 2020 kreximentu ekonómiku atinje porsentu lima. Atu atinje porsentu hitu tenke iha fali tan polítika ruma, nune’e bele atinje alvu refere”.

Enkuantu, agora sei iha hela faze preparasaun OJE 2020 nian, tanba ne’e seidauk define montante loloos, maibé antes ne’e, Vise-Ministra informa katak senáriu OJE ba tinan oin aas liu mak biliaun $1,6.

Notísia relevante : Banku Mundiál Espera Kreximentu Ekonómiku TL Sei Aselera To’o 3.9%

https://www.mof.gov.tl/wp-content/uploads/2013/07/Timor-Leste_Econ_Growth_to_2030.pdf

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here