Komandu Polisia Nasionál Timor-Leste (PNTL) realiza jogu futebol salaun (Futsal) PNTL Cup hodi hametin relasaun entre Polisia ho komunidade no joventude sira. Imajen/PNTL

DILI, 23 jullu 2019 (TATOLI)-Komandu Polisia Nasionál Timor-Leste (PNTL) realiza jogu futeból salaun (Futsal) “PNTL Cup” hodi hametin relasaun entre Polisia ho komunidade no juventude sira.

Jogu ne’e partisipa direita husi klube 23 kompostu husi FC MOP, FC Boa Sorte, FC Bermeta, FC Esilva, FC Battosae, FC Casardante, FC Madohi, FC VDL, FC Amor Timor, FC Kuartel Jerál PNTL, FC Acpol, FC Because United, FC Estrela Baguia, FC Ramelau, FC Maudoko, FC RRCN FC Triple, FC DLP, FC Gijel, FC Gezema Bataka, FC HFC, FC Mankodo no FC Becusi de Baixo.

Kompetisaun jogu amizade ne’e loke direita husi Xefe Komisaun Organizadora Superintendente Asistente António da Luz   ho jogu dahuluk entre klube FC Boa Sorte hasoru klube Battosae ne’ebé asiste husi Komandante  Batalliaun Orden Publika (BOP) Superintendente Abrão Quintas.

Jogu ne’e hetan apoiu husi Patrosinadór Kompañia E-Silva Car Rental, Pertamina Internasionál Timor, Kompañia TELEMOR, Kompañia HEINEKEN no Kompañia Instanshop.

Prémiu ne’ebé sei fornese ba manan na’in sira maka I lugar  hetan osan ho valor $1500.00 inklui taxa permanente no taxa rotativa, II lugar $1000.00 inklui taxa, III lugar $750.00 inklui taxa no IV lugar $500.00 inklui taxa.

Superintendente Asistente, António da Luz informa, jogu PNTL Cup hanesan kontinuasaun husi jogu ne’ebé realiza iha tinan 2018 ba taxa PNTL Cup no taxa rotativa manan husi klube FC Kaicardante tanba ne’e tinan ida ne’e realiza fila-fali nune’e klube sira ne’ebé partisipa hodi kompete hodi manan taxa rotativa ne’ebé maka iha.

António espera, liu husi jogu sei halo selesaun ba ekipa futsal nasionál ne’ebé sei prepara atu partisipa iha eventu nasionál no internasionál ba torneiu futsal.

Iha fatin hanesan, reprezentante Federasaun Futeból Timor-Leste (FFTL), Quintão hateten, jogu futsal hanesan elementu futeból ida importante tebes ne’ebé ema bolu  five site game ne’ebé elabora iha diresaun tékniku FFTL nian.

“Imi kompete ho didi’ak ba tanba kompetisaun futsal mós la’ós atu joga de’it iha nivel klube iha Dili laran, maibé dala barak ita Timor mós reprezenta Timor-Leste ba iha kompetisaun futsal internasionál iha AFF no AFC nian iha Ázia,” tenik nia.

Federasaun hato’o mensajen ba jogadór sira ne’ebé hola parte iha jogu ne’e atu bele  kompete ho esportivu no didi’ak no kadi didi’ak sira nia talentu indivíduu ka ekipa atu bele hetan selesaun iha tempu oin mai

Jogu ne’e realiza tanba servisu hamutuk PNTL ho Federasaun Futeból Timor-Leste (FFTL) hodi halo preparasaun no realiza eventu ida ne’e no torneiu ne’e sei hala’o iha loron sábadu no domingu lokraik iha kampu futsal kuartél BOP Kompañia Alfa hahú iha loron 22  jullu to’o Setembru 2019.

Jornalista: Eugénio Pereira

Editór : Francisco Simões  

 

HAKEREK NO HATÁN

Please enter your comment!
Please enter your name here