DILI, 23 jullu 2019 (TATOLI)-Ministru Administrasaun Estatál ein-Ezersísiu, Abílio José Caetano, informa, rezultadu avaliasaun ba lista naran ne’ebé aprezenta husi Servisu Administrasaun Dom Aleixo hodi substitui kargu Administradór Postu Administrasaun Dom Aleixo seidauk prienxe rekizitu.
“Ami simu ona proposta husi Postu Administrasaun Dom Aleixo, maibé seidauk prienxe rekizitu,” hateten Abílio José Caetano ba Ajénsia TATOLI iha Salaun MAE, ohin, iha Caicoli, Dili.
Rekizitu importante ida maka kandidatu ne’ebé maka sei asume kargu refere tenke ho nivel V ka grau c. Tanba ne’e, Abílio Caetano, hateten, MAE sei kontinua iha prosesu identifikasaun ba naran kandidatu foun hodi entrega ba Komisaun Funsaun Públika para hetan aseitasaun no fó tomada pose.
Mezmu simu ona lista naran balun, maibé Governante ne’e lakohi adianta ba públiku tanba la prienxe kritéria.
Adjuntu Administradór Munisípiu Dili, José Filipe Ximenes Smith, maka oras ne’e, asume provizóriu servisu no kompeténsia Administradór Postu Dom Aleixo hodi substitui administradór matebian Simplício dos Santos Mendonça.
Notísia Relevante : José Smith Asume Kargu Provizóriu Administradór Postu Dom Aleixo
Jornalista : Osória A. Marques
Editór : Francisco Simões