Embaixadór New Zealand ba Timor-Leste, Philip Hewitt. Imajen/Egas Cristovão

DILI, 23  jullu 2019 (TATOLI)-Embaixadór Nova Zelándia ba Timor-Leste, Philips Hewitt, hatete  nia Governu kontinua tulun Timor-Leste hodi fó apoiu iha setór turizmu, agrikultura no edukasaun.

“Nova Zelándia nian suporta agora daudaun ne’e, ba iha setór turizmu agrikultura no kafé no mós  ba iha área edukasaun nian, ida ne’e maka prioridade ba tinan lima nian Governu Timor-Leste ho Governu Nova Zelándia hahú husi 2015 to’o 2020 ”, diplomata ne’e dehan ba jornalista sira hafoin soru-mutu ho Sekretáriu Estadu Kooperativa, Arsénio Pereira, iha Bebora, ohin.

Nia dehan, Nova Zelándia mós sei haree iha futuru prioridade ne’ebé mak sei ko’alia ho Timor-Leste hodi bele haree área ne’ebé mak sira bele apoia.

Iha okaziaun hasoru malu ho Sekretáriu Estadu Kooperativa (SEKOOP) ne’e, Philips Hewitt hakarak atu hatene kona-ba viajen foin lalais bá iha Nova Zelándia hodi tuir espozisaun iha rai refere.

Iha fatin hanesan, Sekretáriu Estadu Kooperativa, Arsénio Pereira, dehan enkontru ho embaixadór Philips Hewitt ne’e, nu’udar vizita kortezia ne’ebé embaixadór rasik husu.

Tanba iha semana rua liubá, SEKOOP reprezenta Estadu Timór partisipa feira ne’ebé organiza husi Indonézia, ne’ebé realiza iha Nova Zelandia no partisipa husi nasaun sira iha rejiaun ázia pasífiku nian hamutuk 19.

Aléinde partisipa feira, iha mós forum tolu ne’ebé SEKOOP rasik mós ko’alia iha eventu ne’e.

Liuhusi forum ne’e, Nova Zelandia mós fahe sira nian esperiénsia kona-ba agrikultura, turizmu no asesu ba bolsu estudu.

Notísia relevante : Timor-Leste Partisipa Espozisaun Turizmu Ázia Pasífiku Iha Nova Zelándia

Timor-Leste Promove Produtu Lokál Iha Ezpozisaun Ázia Pasífiku

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here