Sekretáriu Estadu Kooperativa, Arsénio Pereira da Silva. Imajen/Egas Cristovão

DILI, 23  jullu 2019 (TATOLI)-Sekretáriu Estadu Kooperativa (SEKoop), Arsénio Pereira, informa tinan oin, funsionáriu husi SEKoop sei tuir formasaun iha Nova Zelándia.

“Iha tinan kotuk mós Governu Nova Zelándia konvida Sekretáriu Estadu Kooperativa, maibé ita la konsege, ita foin hahú, espera katak iha tinan oin sei haruka funsionáriu sira iha ne’e bá tuir kursu iha tempu badak ninian, ne’ebé maka husi Nova Zelándia nian programa rasik ba tinan lima”, dehan Arsénio ba jornalista sira hafoin enkontru ho Embaixadór Nova Zelándia, Philips Hewitt, iha Bebora, ohin.

Governante ne’e dehan, kursu ne’ebé funsionáriu SEKoop sei tuir, liuliu ba iha kapasitasaun nian.

Ema ne’ebé maka atu kandidata ba iha formasaun ne’e rasik, tenke liuhusi prosesu, la’ós naran haruka bá de’it, tanba programa ne’e rasik la’ós ba SEKoop de’it, maibé mos iha ministériu hanesan Agrikultura , Turizmu no sira seluk, iha oportunidade hanesan.

Arsénio salienta, ba fusionáriu SEKoop sempre fó oportunidade, la’ós bá de’it Nova Zelándia, maibé sei hetan okaziaun bá rai seluk mós, para aumenta sira nian kapasidade.

Aléinde ne’e, Nova Zelándia mós hakarak ajuda SEKoop iha área kooperativa tanba sira-nia kooperativa ne’e maka mellór iha mundu.

“Ida ne’e maka ha’u mós husu ba Nova Zelándia, ba futuru SEKoop halo kooperasaun ho sira para membru kooperativa sira iha ne’e bá vizita, loke mos sira nian vizaun para fila mai halo di’ak kooperativa”.

Notísia relevante : Governu Nova Zelándia Kontinua Apoia Timor-Leste

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here