Xanana ho Wiranto asina akordu fronteira terrestre iha Jakarta, Segunda (22/07/2019). Imajen/Embaixada TL iha Indonézia

DILI, 23 jullu 2019 (TATOLI)-Deputadu sira iha Parlamentu Nasionál kongratula Xefe Negosiadór Prinsipál ba Asuntu Fronteira Marítima, no mós reprezentante espesiál Governu Timor-Leste ba  negosiasaun fronteira terrestre ho Indonézia, Kay Rala Xanana Gusmão, tanba  ho esforsu tomak hodi finaliza fronteira rai entre país rua ne’e.

Vise-Prezidente Parlamentu Nasionál, Maria Angelina Sarmento, kongratula líder rezisténsia Xanana Gusmão tanba ho esforsu tomak bele rezolve no finaliza ona fronteira rai-maran ho Indonézia.

“Ita fó parabéns ba maun boot Xanana,” Maria Angelina Sarmento hato’o iha plenária Parlamentu Nasionál, ohin

Iha fatin hanesan, Prezidente Komisaun B, Deputadu Adérito Hugo, mós fó nia felisitasaun ba povu Timor Leste no Xefe Negosiadór Prinsipál  Xanana Gusmão  ne’ebé ho esforsu tomak finaliza ona fronteira terrestre entre país rua ne’e no atu kontinua diskute fronteira marítima.

“Ba lider karizmátiku Xanana Gusmão ne’ebé lahatene kolen hodi kontinua luta ba ita-nia soberania kompletu terrestre entre Timor-Leste ho Indonézia nian”, katak.

Aléinde ne’e, Xefe Bankada Partidu Demokrátiku, António da Conceição, mós  hato’o nia votu kongratulasaun ba Xanana Gusmão tanba finaliza  tiha akordu fronteira terrestre atu fó hakmatek no estabilidade ba povu iha Oekusi.

Deputada husi Bankada CNRT, Lúcia Taeki, nu’udar Oekusi oan sente kontente no kongratula Xanana tanba povu Oekusi bele hatene nia fronteira soberania rai-nia.

Antes ne’e, Xefe Negosiadór Prinsipál, Xanana Gusmão  ho Ministru Koordenadór ba Asuntu Polítika  no Defeza Repúblika Indonézia, Wiranto no Ministra Negósiu Estranjeiru Repúblika Indonézia, Retno Marsudi, asina ona  nota prinsípiu aseitasaun ba finalizasaun fronteira terrestre.

Liuhusi asinatura aseitasaun ne’e finaliza ona fronteira terrestre iha segimentu rua hanesan  Noel Besi-Citrana no Bijael Sunan–Oben.

Jornalista : Florêncio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here