Xefe Bankada FRETILIN, Aniceto Longuinhos Guterres Lopez.

DILI, 23 jullu 2019 (TATOLI)–Bankada Opozisaun FRETILIN iha Parlamentu Nasionál (PN), vota kontra Proposta Lei Haat ho razaun la konkorda Governu fó kompeténsia ba empreza estatal Timor GAP, E.P atu foti osan hosi Fundu Petrolíferu la liuhosi orsamentu jerál Estadu (OJE).

“Aditamentu ne’ebé alterasaun Lei Fundu Petrolíferu halo liuhosi Artigu 15-A kona-ba investimentu iha atividade petrolífera, hatudu momoos katak Parlamentu Nasionál hasai tiha ninia podér rasik hodi entrega ba kompañia Timor GAP atu hasai osan diretamente hosi Fundu Petrolíferu atu investe iha atividade petrolífera iha rai laran ka iha rai li’ur. Ida ne’e tau risku ba ita-nia úniku fundu soberanu no úniku fonte ne’ebé sustenta orsamentu Estadu tinan-tinan,” tenik Xefe Bankada FRETILIN, Aniceto Longuinhos Guterres Lopez, liuhosi deklarasaun votu iha diskusaun no votasaun Proposta Lei Haat iha finál globál, iha plenária PN, tersa ne’e.

Aniceto informa, Lei Fundu Petrolíferu laiha ligasaun ruma ho Tratadu Fronteira Marítima nia rekizitu sira tanba lei ne’e regula de’it jestaun ba Fundu Petróleu no asuntu internu Timor-Leste nian.

“Bankada FRETILIN nia preokupasaun katak alterasaun ba Lei Fundu Petrolíferu atu loke dalan de’it ba osan na’in sira ne’ebé atu impresta osan ba Timor-Leste atu sira bele kontrola ita-nia soberania liuhosi uzu diretu Fundu Petrolíferu iha investimentu hamutuk ho sira iha atividade oioin. Bankada FRETILIN kestiona ida ne’e iha semana kotuk, maibé la hetan esplikasaun ruma ne’ebé klaru,” nia akresenta.

Tuir Aniceto, pursentu (%5) ne’ebé mak iha aditamentu ba Lei Fundu Petroliferu, Artigu 15-A atu dehan katak Governu entrega nia xavi ba iha kompañia estatal Timor GAP hodi foti osan liuhosi rendimentu sustentável ne’ebé mak lei ne’e sita. Tanba, iha artigu 15, alínea 4 hosi Lei anteriór, sita ona %5 ba investimentu iha merkadu finanseiru no hanesan ne’e Timor-Leste sei hetan risku.

“Tinan-tinan, bainhira Timor GAP hasai %5 hosi Fundu Petrolíferu atu investe iha atividade petrolíferu,  signifika katak orsamentu ba setór importante sira hanesan edukasaun, saúde, agrikultura no turizmu sai ki’ik liu-tan. Hosi %5 tinan-tinan mós fó ameasa boot ba sustentabilidade Fundu Petróleu. 

Iha parte seluk, Deputada Bankada CNRT, Fernanda Lay hateten kona-ba aditamentu ne’ebé halo, la signifika laiha kontrolu ba orsamentu ne’ebé Timor GAP jere.

“Ha’u husu ba deputadu sira, ita refere liu kona-ba kontrolu Parlamentu Nasionál, la signifika katak ita laiha kontrolu,” tenik Prezidente Komisaun C ne’ebé trata asuntu Finansa Públika, Fernanda Lay, ne’ebé halo relatóriu pareser ba Proposta Lei Fundu Petróleu no Lei Tributária.

Nia konsidera, tenke duni halo alterasaun atu reseita ne’ebé lakon dezde marsu 2018, tenke simu hafoin 30 agostu 2019 ka hafoin Tratadu ne’e asina entre Timor-Leste no Austrália, tanba osan ne’e direitu povu nian ona.

Antes ne’e, Negosiadór Prinsipál ba Delimitasaun Fronteira Maritima, Kay Rala Xanana Gusmão, esplika orsamentu ne’ebe Timor GAP foti hosi Fundu Petroliferu hanesan investimentu.

“Osan la tama ona ba ita-nia fundu, maibé ida Timor GAP atu foti ne’e hanesan investimentu. Sei hatama reseita boot ba Fundu Petróleu,” argumenta Kay Rala Xanana Gusmão iha debate jeneralidade, semana kotuk.

Entretantu, iha Lei Fundu Petrolíferu artigu 15-A kona-ba investimentu iha operasaun petrolífera hateten Fundu Petrolíferu bele aplika diretamente iha operasaun petrolífera, tantu iha territóriu nasionál ka iha estranjeiru, tuir saida mak haktuir ona  iha artigu 22 hosi Lei Atividade petrolífera, liuhosi selebrasaun tranzasaun komersiál, hosi intermédiu Timor GAP, E.P.

Nune’e mós investimentu Fundu Petrolíferu iha operasaun petrolífera, ne’ebé previstu iha númeru anteriór, konstitui klase espesiál  ativu, iha vertude natureza ne’ebé la aplikável rekizitu konstante hosi artigu anteriór.

La liuhosi %5 Fundu Petrolíferu, sei aplika klase ativu, ne’ebé limiti ne’e sei kálkula ho valór totál, tantu Fundu Petrolíferu  hanesan investimentu, ba realizasaun  investimentu inisiál.

Ikus liu, investimentu sira iha operasaun petrolífera iha prezente artigu, la’ós de’it promove dezenvolvimentu  no diversifikasaun ekonomia nasionál, maibé mós ho retornu finanseiru  ba Fundu Petrolíferu, hanesan benefísiu ekonómiku no sosiál investimentu.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Bele halo tok estimasaun ida kona ba timor gap nbe foti osan livere ne, tmv ita koalia ne dhn katak fo returno maibe liu husi saida?

HAKEREK NO HATÁN

Please enter your comment!
Please enter your name here