Advogadu Pedro Aparicio Guterres. Egas/EgasCristovão

DILI, 23 jullu 2019 (TATOLI) – Rezolusaun Governu númeru 16/2013, iha loron 2 jullu 2013, suspende totál atividade grupu arte marsiál sira, hanesan PSHT (Persaudaraan Setia Hati Terate), IKS PTL (Ikatan Keluarga Silat Putra  Timor-Leste) Kera Sakti ho Kmanek Oan Timor Rai Klaran (KORK).

Ho rezolusaun ne’e, Advogadu Pedro Aparicio Guterres husu ba lider nasaun ne’e nian, liu-liu autoridade defeza ho seguransa atu la bele  jeneraliza kazu krime no omisídiu sira ne’ebé akontese iha territóriu tanba arte marsiál.

Parlamentu Nasionál aprova iha loron 6 marsu 2017 no Prezidente Repúblika promulga iha 12 abríl 2017, lei númeru 5/2017 de 19 de abríl kona-ba rejime jurídiku kona-ba  prátika de arte-Marsiál, rituál sira, arma branka, rama ambon no kinta alterasaun ba kódigu penál.

Jurista Pedro Apariçio Guterres akresenta hodi husu ba lider sira atu lalika jeneraliza situasaun krime ne’ebé mak akontese iha rai laran, duun hotu ba grupu arte marsiál tanba lei la permite ona.

Razaun seluk, Pedro Aparicio hateten, TL nia ukun aan liuhusi kolonizasaun Portugés no okupasaun Indonézia ne’ebé mak naruk no kleur, nune’e mentaliza ona joven no sai ona hanesan kultura violénsia ida.

“Ha’u husu ba lider sira tenke hatene violénsia sira ne’ebé mak akontese iha Timor-Leste la’ós tanba arte marsiál no labele dehan fila fali restu kolonialista,” afirma Pedro Aparicio Guterres, ohin, hodi responde Ajénsia TATOLI iha Tribunal Distritál Dili (TDD)

Nia husu ba ukun nain sira, atu di’ak liu preokupa servisu F-FDTL ba seguransa externa entre Indonézia no Austrália atu bele dezenvolve di’ak liu tan instituisaun refere iha futuru.

“Agora, problema akontese duun hotu ba arte marsiál ne’ebé la eziste ona hodi ofende fali ema sira ne’ebé uluk tuir grupu sira ne’e. Se iha ema ruma utiliza arte marsiál  ne’e krime no tenke atua ho rigor tuir lei, la bele hatudu liman arbiru de’it,” afirma Pedro Aparicio.

Nia hatutan, haree fali ba konflitu no krime ne’ebé rejistu iha Tribunál kona-ba kazu arte marsiál foin porsentu ida de’it, maibé krime seluk mak butuk iha tribunál.

Tanba ne’e,  Pedro Aparicio hateten joven sira ne’ebé baku malu responsabilidade hotu-hotu nian atu buka solusaun, la’ós halo akuzasaun mat-matak ba juventude tanba inkapasidade na’i ulun sira nian atu akomoda foin-sa’e iha atividade produtivu no absorve sira iha kampu servisu.

Jornalista : Domingos Piedade Freitas

Editór        : Francisco Simões  

2 KOMENTÁRIU

  1. Tuir rezolusaun governu nune’e duni, infelizmente ita haree ho matan rasik membru arte marsiais barak mak sei halo hela movimentu ba mai, sei hatais farda la’o ba mai, ita bele haree husi Facebook, Instagram no seluk. Ita rona sira oho malu, nutisia fo sai dehan problema privadu maibe ita rona fali husi parte seluk katak buat sira ne’ebe hotu akontese tanba Arte Marsiais mak iha kotuk. Triste tebes haree ida, karik ita la buka solusaun ida ne’ebe di’ak ba kazu ida ne’e mak ita sei kontinua rona ema oho malu ba bebeik tanba de’it Arte marsiais.

  2. husi fundamentu sira ne’e hotu katak implementasaun lei maka sei fraku, tamba ne’e ita presija reforma fila fali lei sira ne’e hodi diskote fila fali hodi kabe ho lei natureza ka tara bandu ruma atu nune’e bele presaun joventude sira nia karakter konflito ne’e bele tauk, konaba oinsa atu halo asaun hare ba norma ne’ebe kabe ona ne forte tebes ba sira atu halo asaun. sujestaun!!!!

HAKEREK NO HATÁN

Please enter your comment!
Please enter your name here