Ekipa Komisaun Organizadora ba Komemorasaun 25 Aniversáriu Komisaun Justisa no Pás konvida Prezidente Repúblika (PR), Francisco Guterres Lú Olo, segunda (22/7). Imajen Mídia PR

DILI, 22 jullu 2019 (TATOLI)—Ekipa Komisaun Organizadora ba Komemorasaun Aniversáriu Komisaun Justisa no Pás ba dala 25, ohin, iha Palásiu Prezidente Nicolau Lobato, Bairru Pité, Dili, konvida Prezidente Repúblika (PR), Francisco Guterres Lú Olo, atu  hato’o liafuan ruma iha serimónia ne’ebé sei hala’o iha 3 agostu tinan ne’e.

Komisaun Organizadora ne’e kompostu hosi Komisaun Justisa no Pás Dioseze Dili, Baucau no Maliana.

Hafoin hasoru malu ho Xefe Estadu, membru ekipa tékniku ba komemorasaun tinan 25 Justisa no Pás no Referendu Timor-Leste, José António de Jesus das Neves hateten, komisaun organizadora atualiza ba Prezidente Repúblika kona-ba preparasaun no realizasaun atividade refere.

Tuir ajenda, hahú loron 3 agostu, Komisaun organizadora sei realiza debate ne’ebé sei halo mós transmisaun direta liuhusi mídia nasionál sira.

Debate ne’e ho naran TimorLeste Voice of The Voiceless ne’ebé iha tema espesifiku ida atu diskute durante fulan lima nia laran to’o dezembru.

Tanba ne’e, iha setembru mai ne’e, sei halo mós debate ida iha loron 21, koinsidente (kebetulan-termu Indonézia) ho Loron Mundiál ba Pás, no sei foti tema ida ne’ebé iha ligasaun ho misaun Komisaun Justisa no Pás iha Timor-Leste.

Iha outubru sei halo mós debate ida iha loron 12, koinsidente ho vizita Amu Papa matebian João Paulo II, ne’ebé sei foti mensajen prinsipál iha 12 outubru, Amu Papa ko’alia iha tempu ne’ebá kona-ba ‘‘Masin no Naroman Mundu nian’’.

Iha novembru sei iha tan debate ida, no sei taka iha loron 10 fulan dezembru, tanba ne’e Xefe Estadu disponível atu hato’o diskursu badak iha eventu importante ne’e. Iha komemorasaun ne’e, sei lansa mós estabelesimentu Komisaun Justisa no Pás Nasionál.

Observasaun Komisaun Justisa no Pás iha Timor, José Neves hateten, justisa hanesan kestaun boot ida iha mundu tomak, la’ós de’it iha Timor-Leste, tanba ne’e husu nafatin ema hotu nia kontribuisaun atu promove justisa.

Nia informa, justisa ho pás labele haketak malu—laiha pás sein justisa no justisa labele prodúz buat seluk aleinde prodúz pás ba sosiedade. Ne’e misaun permanente sosiedade tomak, inklui sidadaun sira no mídia.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here