DILI, 22 jullu 2019 (TATOLI)—Prezidente Komisaun Organizadora Komemorasaun Tinan 20 Referendu, Kay Rala Xanana Gusmão, ohin, iha Jakarta, hala’o vizita ba haree kondisaun saúde, eis Prezidente Repúblika Indonézia, Bacharuddin Jusuf Habibie, ne’ebé baixa iha Ospitál Militár Jakarta, Indonézia.
Embaixadór Timor-Leste iha Indonézia, Alberto X.P. Carlos, ne’ebé akompaña vizita ne’e, informa katak eis Komandante En-Xefe FALINTIL, Kay Rala Xanana Gusmão, ba vizita B.J Habibie, tanba eis prezidente Indonézia nian ne’e mós iha kontribuisaun boot ba prosesu determinasaun Timor-Leste nian.
“Ita hatene, eis Prezidente B.J. Habibie nu’udár Prezidente Repúblika Indonézia nian ida ne’ebé iha tinan 1999 fó opsaun rua ba timoroan sira atu eskolla liuhusi Konsulta Populár ka REFERENDUM,” hateten Embaixadór Alberto X.P. Carlos ba Agência TATOLI liuhusi mensajen rede sosiál WhatsApp.
Enkontru ho Wiranto no Retno Marsudi
Embaixadór Alberto Carlos informa mós katak, ohin lorokraik, oras Jakarta nian, Xanana Gusmão sei ba hasoru malu ho eis Jenerál Wiranto atuál Ministru Koordenadór ba asuntu Polítika Justisa no Defeza Indonézia nian ho Ministra Negósiu Estranjeiru Indonézia, Retno Marsudi, atu ko’alia kona-ba prinsípiu akordadu sobre rezolusaun finál fronteira terrestre entre Indonézia ho Timor-Leste.
Jornalista: Francisco Simões
Editór: Xisto Freitas