Prokuradór Jerál Repúblika (PJR), José da Costa Ximenes. Imajen Mídia PR

DILI, 22 jullu 2019 (TATOLI)—Durante enkontru mensál ho Prezidente Repúblika (PR), Francisco Guterres Lú Olo, Prokuradór Jerál Repúblika (PJR), José da Costa Ximenes informa kona-ba  tinan ne’e Ministériu Públiku (MP) promove nível hotu-hotu.

José esplika, iha 17 jullu 2019, Konsellu Superiór Ministériu Públiku nomea ema na’in-7 ba kargu Sekretáriu Superiór iha Ministériu Públiku, Sekretária iha Serbisu Inspesaun iha Prokuradór Jerál, Sekretaria ba Kontensiozu iha Gabinete Sentrál Kombate Korupsaun no Kriminalidade Organizada no na’in-haat seluk koloka iha distritu judisiál haat ho kargu sekretáriu bazeia ba Estatutu Ofisiál Justisa nian 19/2012.

Prokuradór Jerál Repúblika halo promosaun na’in-9 ba eskrivaun direitu, promove na’in-11 ba adjuntu eskrivaun. Promosaun halo ba ofisiál justisa, serbisu tékniku apoiu administrativu no ba prokuradór sira.

Ho promosaun ida ne’e, PJR informa ba Prezidente Repúblika katak Ministériu Públiku konsege promove nível hotu-hotu, ofisiál justisa iha Ministériu Públiku mós hetan promosaun, funsionáriu públiku ne’ebé suporta nu’udar serbisu apoiu tékniku administrativu mós hetan promosaun, prokuradór sira mós tinan-tinan hetan promosaun.

“Promosaun ida ne’e, ita halo promosaun iha nível hotu-hotu. Ida ne’e maka funsionamentu Ministériu Públiku,” nia esplika.

Ho promosaun sira ne’e sei fasilita liu serbisu prokuradória nian iha nível nasionál. Prokuradór Jerál Repúblika informa kazu sira ne’ebé iha prosesu nia laran iha Ministériu Públiku mak: Dili iha kazu 2400, Baucau 280, Suai 333 no Oé-Cusse 41.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here