Xefe Departementu Abastesimentu, Servisu Agua no Saneamentu (SAS), Francisco Xavier Pereira. Imajen/Osória A.Marques

DILI, 22 jullu 2019 (TATOLI)-Diresaun Servisu Água no Saneamentu (SAS-sigla portugés) Munisípiu Dili,  monta ona kontadór bee moos ba konsumidora iha Dili Leste ho Oeste  purvolta rihun 15 resin.

“Ami monta ona metru kontadór ba konsumidór sira purvolta rihun 15 kompostu husi Dili Leste no Dili Oeste,” hateten  Xefe Departamentu Abastesimentu Bee Moos Munisípiu Dili, Francisco Xavier Pereira ba jornalista sira, ohin, iha ninia servisu fatin, Mascarenhas, Dili.

Ekipa tékniku SAS fahe ba grupu tolu  sei   kontinua halo verifikasaun ba númeru konsumidór ne’ebé diresaun ne’e seidauk monta kontadór hodi monta, atu nune’e, bele  regulariza nesesidade uza bee moos no mós fó atendimentu ba konsumidór ho lais no rápidu.

Kona-ba selu taxa ba estadu, Xefe Departamentu ne’e dehan, nia parte seidauk obriga konsumidór atu selu tanba servisu ne’e seidauk fornese  bee moos ba ema hotu ho  sufisiente.

“Ami mós rekoñese katak ami labele obriga konsumidór sira atu selu impostu tanba ami nia atendimentu no fornesimentu bee moos ba konsumidór sira seidauk másimu,” hateten Francisco Xavier Pereira.

Jornalista          : Osória A. Marques

Editór                : Francisco Simões

HAKEREK NO HATÁN

Please enter your comment!
Please enter your name here