Ponte Bidau Santa Ana. Imajen/ Florêncio Miranda Ximenes.

DILI, 22 jullu 2019 (TATOLI)– Diretór Jerál Ministériu Obra Públiku (MOP), Rui Hernani, informa  katak konstrusaun ponte Bidau Santa Ana ne’ebé konstroe husi  kompañia BTK- Carya Timor Leste, Lda, finaliza no loloos atu inaugura ona, maibé suspende no sei inaugura iha loron 30 agostu.

“Iha karta pedidu ida husi Ministériu Planeamentu no Investimentu Estratéjiku (MPIE) mai Ministériu Obras Públikas katak ponte ne’e sei inaugura iha loron konsulta populár 30 agostu”, Diretór Jerál Rui Hernani ba ajénsia Tatoli iha kna’ar fatin Faról, ohin.

Tuir informasaun, nia dehan ponte ne’e sei tau naran eis Prezidente Repúblika Indonézia, BJ Habibie, no hetan inaugurasaun husi Prezidente Repúblika Indonézia Joko Widodo.

 “Ami seidauk simu informasaun konkreta husi MPIE, maibé ami-nia servisu ba supervizaun konstrusaun ne’e hotu, ne’ebé ita hein de’it husi komisaun organizadora konsulta populár nian liuliu ba inaugurasaun”, katak.

Nia dehan, projetu konstrusaun ponte ne’e, ka’er husi kompañia BTK-Carya Timor Leste, Lda ho númeru kontratu S55/122/MOPTC, 2017, ho durasaun hahú 31 Agostu 2017 to’o 31 Agostu 2018 ho kustu $3,963.319,62.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here