Presidente Komisaun F Parlamentu Nasionál, Maria Barreto. Imajen/Egas Cristovão

DILI, 22 jullu 2019 (TATOLI)—Prezidente Komisaun F ne’ebé trata asuntu saúde, seguransa sosiál no igualdade jeneru Parlamentu Nasionál, deputada Maria Barreto, husu ba governu atu kontinua rekoñese profisionál saúde sira ne’ebé hahú knaar hodi dezenvolve ministériu saúde to’o ohin loron.

“Liga ba tema loron nasionál saúde ba tinan 2019 katak “Lori Saúde Ba Ema Hotu Moris Di’ak ho Dignu” ida ne’e dezafia tebes ba Estadu, Parlamentu Nasionál, Governu no sosiedade TL tomak oinsá atu realiza no dezenvolve, maske ministériu ho profisionál saúde sira sei enfrenta dezafiu oin-oin”, dehan deputada hosi bankada Kongresu Nasionál Rekonstrusaun Timor (CNRT-sigla portugés), iha ninia diskursu ba komemorasaun loron saúde nasionál ne’ebé hala’o iha Sentru Konvensaun Dili (CCD, sigla portugés), segunda (22/7/2019).

Nia hatutan atu responde problema saúde ne’ebé iha la’ós knaar husi minstériu no profisionál saúde sira-nian de’it maibé saúde ne’e asuntu sosiál ida ne’ebé iha fatór determinante sosiál hanesan ekonomiku, kulturál, etniku ka rasa, psikolojiku, alimentasaun ka hahan, saneamentu, ne’ebé bele kontribui ba problema saúde ema ida-nian.

Tanba ne’e, nia dehan atu hadi’a ka promove ema hotu moris di’ak ho dignu, presiza aprosimasaun no intervensaun liuhusi haforsa no hametin liña kooperasaun no koordenasaun ho parte relevante sira.

Ida ne’e, nia afirma serbisu intersektorial ne’ebé tenke koordena ho ministériu relevante sira, parseriu dezenvolvimentu, instituisaun  relijioza, akademiku, sosiedade sivil sira no define papel parte ida-idak nian liuhusi elabora polítika estratejia planu konjuntu.

“Importante mak planu asaun hirak ne’e atu iha prátika  ho sentidu ba konkretizasaun ida, Timor-Leste  saudavel fazeadmente. Ema timoroan hotu bele moris di’ak ho dignu”, nia realsa.

Atu moris di’ak no dignu, tuir nia tenke haforsa jestaun no administrasaun boa-governasaun iha sistema nasionál saúde nia laran. Ida ne’e tenke hahú husi nivel sentrál to’o serbisu sentrál sira nu’udar moto ba dezenvolvimentu setor saúde serbisu munsipál, liuhusi desentralizasaun administrativu hodi desentraliza programa no atividade saúde nian.

Aleinde ne’e, nia hateten hadi’a prestasaun no kuidadu saúde iha nasaun laran tomak ho espesiál hodi fó atensaun ba área remota no populasaun ne’ebé la favoravel. Knaar ida ne’e tenke tuir prinsípiu inkluzaun,  efisiénsia no kualidade hodi bele atinji prinsípiu kobertura universal saúde hanesan la abandona ema ida iha kotuk.

Jornalista: Felicidade Ximenes

Editór: Rafi Belo

HAKEREK NO HATÁN

Please enter your comment!
Please enter your name here