Kompañia internasionál China Wuyi nahe pavimentu asphalt iha estrada trosu Tasi-Tolu-Tibar. Fofo/ Mídia MOP.

DILI, 22 jullu 2019 (TATOLI) – Diretór Jerál  Ministériu Obras Públikas (MOP), Rui Hernani, haktuir Ministru Obras Públikas, Salvador Pires, orienta ona kompañia China Wuyi hodi finaliza lais konstrusaun estrada iha área Tasi-Tolu to’o Tibar molok loron konsulta populár ba dala 20 ne’ebé sei akontese iha 30 Agostu tinan ne’e.

“Ministru fó ona orientasaun ba Diresaun Jerál Obras Públikas hodi akompaña kompañia China Wuyi atu aselera konstrusaun estrada Tasi-Tolu to’o Tibar, liuliu pavimentu asphaltic antes komemorasaun loron konsulta populár iha 30 agostu tinan ne’e”, Rui Hernani ba Ajénsia Tatoli, iha nia kna’ar fatin, Faról, ohin.

“Ami-nia ekipa tékniku hala’o hela akompañamentu diária ba obra tanba iha fatin ne’ebá sei komemora tinan 20 konsulta populár”, akresenta.

Nia dehan pelumenus iha área besik benvindu Tasi-Tolu nian bele remata atu Timor-Leste bele hatudu buat di’ak ba bainaka sira hosi rai-li’ur ne’ebé mai partisipa loron konsulta populár.

Nune’e mós, ekipa MOP sei halo vizita bá rotunda Tibar ne’ebé ho ligasaun ba dirasaun Ermera ho Likisá nian hodi bele finaliza mós.

Ho orientasaun ministru MOP, nia dehan diresaun jerál MOP sei kontinua halo kontrolu rutina hodi haree kualidade servisu ka kamada Sub-Base, Base-Course no pavimentu asphalt trosa Tasi-Tolu-Tibar.

Projetu konstrusaun estrada ne’e hala’o husi kompañia internasionál China Wuyi ho montante orsamentu millaun $12-resin no hahú iha 28 fevereiru 2017 to’o outubru 2019.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here