Diretor Jeral MOP, Rui Hernani. Imajen/Florêncio Miranda Ximenes.

DILI, 22 jullu 2019 (TATOLI)-Ministériu Obra Públika (MOP) hahú kria ekipa brigada atu kontrola kualidade projetu Estadu sira ne’ebé uza osan empréstimu, liuliu estrada trosu Baukau-Vikeke.

“Ita iha ona konsulta atu halo supervizaun ba projetu estrada trosu Baukau-Venilale no Venilale-Vikeke hodi garante nia kualidade,” tenik Diretór Jerál Ministériu Obra Públika, Rui Hernani, ba Ajénsia Tatoli iha kna’ar fatin Faról, segunda ne’e.

Tuir nia, konstrusaun ba projetu estrada Baukau ne’e sei hetan supervizaun husi ekipa Unidade Jestaun Projetu (PMU, sigla inglés) ho International Consultant no Technocrats PVT. Ltda husi Índia assosiadu ho DETILE Consultant Ltd.

“La’ós sira de’it, maibé Ministériu Obra Públika mós nomea ona brigada atu halo vizita periódika ba obra sira ne’e atubele akompaña progresu obra sira ne’e, fiskalizasaun materiál ne’ebé kontraktor utiliza ba obra”, katak.

Diretór Jerál MOP ne’e dehan materiál ba obra ne’e determina ba kualidade obra. “Materiál kuandu di’ak prosesu konstrusaun la’o tuir prosedimentu tékniku obra sira ho kualidade di’ak, maibé materiál la di’ak kualidade mós la di’ak”.

Projetu estrada trosu Baukau-Vikeke ka’er husi kompañia internasionál China Railway International Group. Co.Ltd ho China Overseas Engineering Group (COVEC) no sei hetan supervizaun husi International Consultant no Technocrats PVT. Ltda. India assosiadu ho DETILE Consultant Ltd.

Konstrusaun ba estrada nasionál trosu Baukau-Venilale no Venilale-Vikeke ho orsamentu empréstimu husi ADB ho montante pur volta millaun $40, kuaze kilómetru 60 ho durasaun tinan rua.

Atu garante kualidade projetu iha Timor-Leste, Ministériu Obra Públika (MOP) hahú estabelese ona ekipa brigada tolu mak Leste, Sentru no Oeste hodi haree no kontrola projetu Estadu nia ne’ebé implementa liuhosi orsamentu Estadu no empréstimu sira.

Ekipa brigada iha Leste sei halo kontrola ba projetu hotu ne’ebé implementa iha área munisípiu Lautein, Baukau no Vikeke, ekipa brigada Sentru kontrola projetu sira iha munisípiu Manatutu, Dili, Aileu no Likisá no brigada Oeste toma konta ba munisípiu Bobonaru, Ainaru, Kovalima, Manufahi no Ermera.

Polítika estabelese ekipa brigada ne’e tanba MOP planeia realiza projetu 139 iha 2019 nian,  estrada rurál hamutuk 99  ho distánsia kilómetru 700-resin no projetu manutensaun estrada hamutuk 40-resin ho distánsia kilómetru 500-resin iha territóriu Timór laran tomak.

Orsamentu ba projetu hirak ne’e iha liña ministeriál hamutuk millaun $160-resin para realiza projetu sira ne’e, inklui ba ponte sira.

Jornalista: Florêncio Miranda Ximenes

Editora : Maria Auxiliadora

1 KOMENTÁRIU

  1. ADN hola fali knaar saida???
    Iha ga lae kooperasaun entre ministerial ho ADN???
    ADN mos hanesan ministerio ida hotu ga???

HAKEREK NO HATÁN

Please enter your comment!
Please enter your name here