Diretor Jeral MOP, Rui Hernani. Imajen/Florêncio Miranda Ximenes.

DILI, 22 jullu 2019 (TATOLI)– Diretór Jerál Ministériu Obras Públikas, Rui Hernani, informa Diresaun Jerál Obras Públikas (DGOP) Unidade Jestaun Projetu (PMU, sigla inglés) hahú hala’o preparasaun no reuniaun pre-konstrusaun atu halo lansamentu fatuk dahuluk ba projetu trosu Baukau-Vikeke iha Agostu.

“Ami esforsu hela halo preparasaun dokumentu administrativu no tékniku ba ezekusaun projetu refere, inklui ko’alia mós planu ba mobilizasaun ekipamentu pezadu no define data fiksu ba serimónia lansamentu tau fatuk dahuluk,” Diretór Jerál MOP ba ajénsia Tatoli iha kna’ar fatin Faról, ohin.

Tuir orientasaun husi Ministru Obra Públiku (MOP), Salvadór Eugénio Soares dos Reis Pires, katak lansamentu fatuk dahuluk tenke hala’o iha loron 9 fulan-agostu tinan ne’e. Tanba ne’e, nia dehan tékniku sira ezekuta orientasaun Ministru nian hodi hala’o reuniaun pre-konstrusaun ho kontraktor no konsultór, inklui partisipa mós husi ofisiál sira husi Banku Dezenvolvimentu Aziátiku (ADB).

“Ita-nia Ministru hakarak tenke lansa primeira pedra ba projetu ne’e iha loron 9 agostu, ne’ebé ami mós esforsu atubele realiza duni iha loron ne’e,” katak.

Daudaun ne’e, Diretór Jerál ne’e dehan PMU sei halo identifikasaun fatin atu hafasil kompañia kontraktor bele halo mobilizasaun pezada sira hodi bele hala’o konstrusaun, hafoin lansamentu fatuk dahuluk.

 “Ami mós sei diskute konvite karik iha lansamentu ne’e Primeiru-Ministru mak halo ou Ministru Estadu no Prezidénsia Konsellu Ministru”.

Projetu estrada trosu Vikeke no Baukau ne’e sei ka’er husi kompañia internasionál China Overseas Engineering Group (COVEC) ho kilómetru 60 ho orsamentu empréstimu husi Banku Dezenvolvimentu Aziátiku ho totál millaun $40-resin ho durasaun konstrusaun tinan rua. Projetu ne’e, liuhusi konkursu públiku husi Komisaun Nasionál Aprovizionamentu no hetan ona vistu préviu husi Kámara Konta.

Antes ne’e, Ministru Obras Públikas (MOP), Salvador Eugénio Soares dos Reis Pires, hatete iha inísiu fulan-Agostu tinan ida-ne’e, sei halo lansamentu fatuk dahuluk ba konstrusaun estrada trosu Baukau to’o Venilale no Venilale to’o munisípiu Vikeke.

“Ha’u fó ona instrusaun ba Diresaun Jerál Obras Públikas (DGOP) no Unidade Jestaun Projetu (PMU) liuliu ba projetu empréstimu atu organiza ona serimónia lansamentu primeira pedra, ne’e konstrusaun bele hahú ona iha tempu badak,” Ministru Salvadór dehan.

Governu Konstitusionál Daualuk kontinua fó prioridade ba konetividade entre nasionál ba munisípiu no munisípiu ba área rurál hodi fasilita movimentasaun populasaun sira-nian. Tanba ne’e, tinan-tinan Governu kontinua tau orsamentu millaun $20 hodi halo konstrusaun ba estrada rurál sira.

Jornalista: Florêncio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here