Logo MAEKOM

DILI, 22 jullu 2019 (TATOLI)-Movimentu Asaun Ekonomia Komunitária (MAEKOM) bandu nia membru sira atu labele halo proposta ba Governu hodi hetan subvensaun públiku.

“Iha MAEKOM labele simu subvensaun públiku hosi Governu, ida ne’e bandu, sé maka hetan, sai hosi MAEKOM”, alerta Diretór MAEKOM, Rui Castro, iha serimónia kolleita manu broiler iha aldeia Rai Kuak, suku Lahane Osidentál, postu administrativu Vera Krús, Munisípiu Dili, ohin.

Tuir Rui Castro, subvensaun públiku halo ema la kriativu, halo ema la sente na’in tanba la’ós mai hosi nia kosar-been.

Nia akresenta sé de’it maka sai membru MAEKOM tenke hahú ho buat ne’ebé iha, tanba motto MAEKOM nia dehan, hahú hosi ki’ik ka neineik, maibé beibeik más tenke ho ambisaun boot.

MAEKOM tenke servisu rasik, la depende ba ajuda ne’ebé ho gratuita, enkuantu kuandu tama iha MAEKOM tenke ho espíritu negósiu.

Parte seluk, Ministru Agrikultura no Peska, Joaquim José Gusmão dos Reis Martins, apela katak tinan ne’e laiha orsamentu ba transferénsia públika, maibé Governu sei haree transferénsia ne’ebé durante ne’e la’o ona hosi asosiasaun sira hafoin halo estudu filafali.

Ministru argumenta katak subvensaun públika la halo ema ka asosiasaun ida atu depende ba osan Governu, maibé bele buka rasik osan.

Enkuantu, MAEKOM fó formasaun no orientasaun ba ninia membru sira atu prodús produtu ne’ebé merkadu sira presiza. Nune’e ho presu merkadu sei regula hosi MAEKOM atu labele boot liu.

MAEKOM servisu hamutuk ho Ministériu Agrikultura no Peska, Ministériu Komérsiu Indústria inklui Sekretáriu Estadu Formasaun Profisionál no Empregu hodi prepara kondisaun no rede negósiu oioin, maibé depende ba vokasaun negósiu hosi komunidade sira, liuhosi família ida, negósiu ida.

Tanba ne’e, setór produtivu sai indústria familiar, indústria povu nian no indústria timoroan nian, nune’e maka MAEKOM hakarak lori negósiu ba povu no povu maka sai na’in ba negósiu, ne’ebé hamosu suku ida produtu ida.

Notísia relevante : MAEKOM Iha Alvu Okupa Merkadu Nasionál Porsentu 40 Ho Broiler

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here