Estrutura LFA halo konferénsia ba imprensa. Imajen Mídia LFA.

DILI, 22 jullu 2019 (TATOLI)—Órgaun Ezekutivu Liga Futeból Amadora (LFA), ohin, loke ona janela transferénsia ba klube ualu ne’ebé hamahan-án iha Primeira Divizaun.

Objetivu hosi loke janela transferénsia ne’e fó oportunidade ba klube sira atu fa’an no sosa jogadór. Durasaun ba janela transferénsia sei hala’o hahú hosi 22 jullu to’o 05 agostu tinan ne’e.

“Prosesu ne’e hala’o atu klube sira bele iha oportunidade hodi sosa no fa’an sira-nia jogadór tuir sira-nia nesesidade,” tenik Diretór Administrasaun Planeamentu Finansa LFA, Adolmado Soares Amaral liuhosi konferénsia imprensa ne’ebé hala’o iha salaun Xanana Sport Center, Bairru Formosa, Dili, ohin.

Diretór ne’e informa, bainhira prosesu janela transferénsia ne’e taka, jogu segunda volta sei hala’o iha munisípiu rua hanesan Baucau no Maliana.

“Ita halo nafatin aprosimasaun ho Sekretaria Estadu Juventude no Desportu (SEJD) hodi husu atu jogu segunda volta ne’e hala’o iha munisípiu. Ita haree Estádiu Dili kondisaun labele loos ona. Osan ba dezlokasaun klube ita sei fó kada klube ida osan rihun $1000 ba kada dezlokasaun,” diretór ne’e esplika.

Iha fatin hanesan, Diretór Kompetisaun LFA, Martinho Ribeiro akresenta, maski janela transferénsia la’o maibé jogu kontinua la’o hanesan babain.

“Jogu jornada 7 ita sei hala’o iha Dili. Jornada 8 to’o 14 ita sei hala’o iha munisípiu maibé Dili mós iha hotu,” Martinho esplika.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here