Ministru Ensinu Superiór, Siénsia no Kultura, Longuinhos dos Santos Akompaña Husi Sekretáriu Estadu Arte no Kultura, Teófilo Caldas Foto Hamutuk iha Abertura ba Kursu Lingua Portugues Husi Instituisaun Ensino Superiór Privada Iha Timor-Leste, iha eis edifísiu Alfándega, Kolmera, Dili, Kinta (18/07/2019). Imajen Egas Cristóvão

DILI, 22 jullu 2019 (TATOLI)— Governu Konstitusionál da-ualu liuhusi Ministériu Ensinu Superior Siénsia Kultura (MESSK) ohin, informa dosente na’in lima inklui dosente ne’ebé hetan kontratu husi MESSK hahú ona tuir  formasaun lian-portugés hodi bele hasa’e sira-nia abilidade.

Institutu privadu 10 ne’ebe hetan atensaun husi Governu mak Universidade da Pás (UNPAZ), Universidade Dili (UNDIL), Universidade Oriental (UNITAL), Institute of Business (IOB), Dili Institute of Technology (DIT), CANOSSA, Institutu Superior Cristal (ISC), ICE, ICR no Institutu Profesores Katóliku Baucau.

“Planu husi MESSK hodi fó atensaun ba institutu privadu sira ne’e para ba futuru bele hetan dosente sira ne’ebé iha abilidade atu reforsa liután institutu sira ne’e ba oin sai di’ak liután”, dehan Ministru Ensinu Superior Siénsia Kultura, Longuinhos dos Santos, ba jornalista sira iha nia kaar fatin Kolmera, segunda (22/7/2019).

Kursu ne’e, nia hatutan sei hahú iha 2019 ba to’o 2023, nune’e institutu superior sira bele hetan ona dosente hamutuk ema na’in 600 ho kapasidade no koñesimentu bele ko’alia ona lian Portugés ho di’ak.

Entretantu, Reitor Univesiade Timor Lorosa’e (UNTL), Florindo Pereirra, haktuir programa ida ne’e ne’e di’ak tebes, tanba bele ajuda hasa’e tan kapasidade dosente sira nian.

Nia informa, dosente UNITAL hamutuk 100 resin mak sei hetan oportunidade hodi partisipa iha formasaun ba lian Portugés ne’e.

“Portantu planu no programa MESSK nia ne’e ajuda ona UNITAL atu eziste liután hodi kompete nu’udar Institutu Privadu para bele buras no forte nafatin ba futuru”, dehan Florindo Pereira.

Ministru Longuinhos dos Santos, hateten semana kotuk ninian parte halo ona  lansamentu  abertura kursu lian Portugés ho professores na’in lima, inklui mós prevee orsamentu $75.000 hodi apoiu vensimentu ba profesór sira ne’e no fasilita ho disionáriu ba dosente sira ne’ebé mak sei tuir formasaun lian Portugés ne’e.

Jornalista: Tomé Amado

Editór: Rafi Belo

HAKEREK NO HATÁN

Please enter your comment!
Please enter your name here